Адкрываючы сустрэчу, генэральны сакратар Паўночна-Атлянтычнага альянсу Енс Столтэнбэрг запэўніў, што NATO будзе гатова абараняць ад уварваньня кожную цалю сваёй тэрыторыі. Ён падкрэсьліў, што альянс ня ўдзельнічае ў гэтым канфлікце, аднак яго члены аказваюць Украіне беспрэцэдэнтную падтрымку, каб яна магла абараніцца ад Расеі, піша BBC.
«Мы ня можам дазволіць Пуціну перамагчы, інакш гэта дасьць зялёнае сьвятло іншым аўтарытарным лідэрам, пакажа ім, што яны могуць дасягнуць сваіх мэтаў з дапамогай ваеннай сілы. Гэта зробіць наш сьвет яшчэ больш небясьпечным для ўсіх нас. Таму ў нашых агульных інтарэсах бясьпекі падтрымліваць Украіну», — заявіў Столтэнбэрг.
Ён абвінаваціў Расею ў нарошчваньні жорсткасьці ў гэтай вайне і згадаў пра фінансавы цяжар, які яна наклала на Эўропу і іншыя краіны сьвету.
«Папраўдзе, мы ўсе плацім цану за расейскую вайну ва Ўкраіне, але мы плацім гэтую цану грашамі, у той час як Украіна плаціць яе крывёй», — сказаў генэральны сакратар.
Дапамога зброяй
Для перамогі ў вайне краінам NATO неабходна тэрмінова павялічыць аб’ёмы вытворчасьцві ўзбраеньняў, заявіў міністар замежных спраў Украіны Дзьмітро Кулеба. У інтэрвію выданьню Politico ён заявіў, што немагчыма перамагчы на полі бою ў доўгатэрміновай пэрспэктыве, не інвэстуючы ў вытворчасьць зброі: «Пакуль мы змагаемся ў бітвах сёньняшняга дня, мы павінны думаць, як мы будзем змагацца ў заўтрашніх бітвах».
Па словах Кулебы, ня трэба марнаваць месяцы на перамовы з краінамі, якія не жадаюць з палітычных прычынаў дзяліцца з Украінай узбраеньнем, якое дапамагло б ёй у вайне. Ён таксама ўдакладніў, што больш за ўсё Ўкраіна мае патрэбу ў сыстэмах СПА, танках і вытворчых лініях.
У ходзе саміту, як чакаецца, яго ўдзельнікі абмяркуюць павелічэньне вайсковай дапамогі, уключаючы сыстэмы супрацьпаветранай абароны, боепрыпасы, паліва, мэдыкамэнты і зімовы рыштунак. Таксама Ўкраіна просіць даць ёй наступальнае ўзбраеньне.
Саміт у Бухарэсьце адметны тым, што менавіта ў румынскай сталіцы 14 гадоў таму, у 2008 годзе, прынялі рашэньне аб магчымым уступленьні Ўкраіны і Грузіі ў альянс. Уладзімір Пуцін назваў гэтае рашэньне прамой пагрозай бясьпецы Расеі, а праз чатыры месяцы Расея ўварвалася на тэрыторыю Грузіі. У 2014-м баявыя дзеяньні, разьвязаныя пры прамым спрыяньні Расеі, пачаліся ва Ўкраіне, што ў 2022 вылілася ў поўнамаштабную вайну, акупацыю часткі ўкраінскіх тэрыторый на ўсходзе, поўначы і поўдні, а таксама катаваньняў і забойстваў цывільнага насельніцтва Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
