Вайсковая выведка пацьвердзіла вяртаньне Херсона пад кантроль Украіны
Галоўнае ўпраўленьне выведкі Міністэрства абароны Ўкраіны фактычна пацьвердзіла вяртаньне Херсона пад кантроль украінскай улады.
Вайсковая выведка зьвярнулася да расейскіх вайскоўцаў, якія пераапрануліся ў цывільнае, бо не пасьпелі пакінуць Херсон.
«Херсон вяртаецца пад кантроль Украіны, у горад заходзяць Узброеныя сілы Ўкраіны. Шляхі адступленьня расейскіх акупантаў пад агнявым кантролем украінскага войска. Любыя спробы супрацьдзейнічаць Узброеным сілам Украіны будуць спыненыя. Кожны расейскі вайсковец, які будзе супраціўляцца, будзе зьнішчаны. У вас ёсьць адзіны шанц пазьбегнуць гібелі — тэрмінова здацца ў палон», — заклікала ўкраінская выведка.
Адначасова ўкраінскія выведнікі зьвярнуліся да тых грамадзян Украіны, якіх прымусова падчас расейскай акупацыі мабілізавалі ў расейскую армію. Іх заклікалі тэрмінова паведаміць пра гэта ўладам і таксама здацца ў палон.
Дэпутат: Пакуль праходзіць зачыстка, грамадзянам лепш быць па дамах
Дэпутат Херсонскай абласной рады Сяргей Хлань паведаміў, што Ўзброеныя сілы Ўкраіны ўвайшлі ў Херсон і праводзяць зачыстку.
«Пакуль праходзіць зачыстка, грамадзянам лепш быць па дамах. Сытуацыя ў горадзе з хлебам і палівам цяжкая, электраэнэргіі хутка тыдзень як няма, адпаведна, і хлеба таксама, таму што для працы хлебазаводу неабходная электрыка. Сувязі няма. Гуманітарная сытуацыя сапраўды складаная», — сказаў Сяргей Хлань на брыфінгу 11 лістапада.
Паводле яго, расейскія акупацыйныя ўлады штучна давялі гуманітарную сытуацыю ў Херсоне да крытычнага ўзроўню.
«Але галоўнае, што Херсон цяпер знаходзіцца амаль пад кантролем Узброеных сіл. Засталася зачыстка. На гэты пэрыяд варта быць вельмі пільнымі і акуратнымі», — дадаў дэпутат Херсонскай абласной рады.
Сяргей Хлань мяркуе, што цягам тыдня горад цалкам пяройдзе пад кантроль Украіны.
«Мы разумеем, што частка расейцаў пераапраналіся ў цывільнае і не пасьпелі пераправіцца. Яны разгрупаваліся па горадзе, колькасьць такіх людзей пакуль невядомая. Афіцыйна можна будзе сказаць толькі пасьля таго, як гэта абвесьціць камандаваньне Ўзброеных сіл Украіны, а яны гэта зробяць толькі пасьля зачысткі гораду», — падкрэсьліў дэпутат.
У той жа час ва ўкраінскіх тэлеграм-каналах пачалі зьяўляцца фатаздымкі і відэазапісы, як херсонцы зьбіраюцца ў цэнтры Херсона, каб сустрэць украінскіх вайскоўцаў. Яны нясуць з сабой украінскія сьцягі, адзін зь іх нібыта ўжо павесілі на адным з адміністрацыйных будынкаў гораду.
Херсонцы вітаюць вызваліцеляў
Да вайскоўцаў людзі выходзяць цэлымі сем’ямі, дзеці трымаюць кветкі для сваіх вызваліцеляў. Мясцовыя радуюцца вяртаньню гораду пад кантроль Украіны і кажуць, што сёньня першы дзень, калі яны выйшлі на вуліцы — да гэтага сядзелі ў падвалах.
Людзі гукаюць «Слава Ўкраіне!», дзякуюць украінскім вайскоўцам і разам сьпяваюць дзяржаўны гімн.
Херсон быў адзіным абласным цэнтрам, які Расея захапіла з пачатку поўнамаштабнай вайны 24 лютага.
Пра якія-небудзь баі ў горадзе цяпер не паведамляецца. Мінабароны Расеі раней заявіла, што ўсе расейскія вайскоўцы былі выведзеныя з правага берага Дняпра, дзе знаходзіцца Херсон, раніцай у пятніцу.
Кірыл Цімашэнка, намесьнік кіраўніка Офісу прэзыдэнта, паведаміў у сваім тэлеграм-канале, што старшыня Херсонскай абласной вайсковай адміністрацыі Яраслаў Янушэвіч ужо гатовы да большага аб’ёму працы. Імаверна, яны разам ужо знаходзяцца ў Херсоне.
Пра адступленьне на правы бераг камандуючы расейскай групоўкай генэрал Сяргей Суравікін абвясьціў у сераду. Адвод войскаў, такім чынам, заняў менш за два дні. Расейскія войскі падарвалі за сабой масты праз Дняпро.
Мінабароны Расеі паведаміла, што вывела на левы бераг Дняпра з Херсонскай вобласьці 30 тысяч вайскоўцаў і 5 тысяч адзінак вайсковай тэхнікі.
У Сілах абароны поўдня Ўкраіны раяць радавацца вызваленьню Херсона стрымана
Кіраўніца аб’яднанага каардынацыйнага прэс-цэнтру Сілаў абароны поўдня Ўкраіны Натальля Гумянюк заявіла, што баявая апэрацыя па вызваленьні Херсона яшчэ працягваецца.
Паводле яе, фатаздымкі і відэа з Херсона, якія ўсё больш тыражуюць розныя ўкраінскія інтэрнэт-рэсурсы, сьведчаць пра тое, што Херсон — гэта Ўкраіна і ён заўсёды быў украінскім.
«Яны [фота] азначаюць, што херсонцы нязломныя, што яны ўмеюць чакаць і маюць вытрымку, якую мы заўсёды просім мець у часе вайсковай апэрацыі, і мы ўдзячныя, што яны гэта вытрымалі, і цяпер так празрыста намякаюць, што, напэўна, у нас будзе ня проста добры дзень, а яшчэ і добры сон», — дадала яна.
Натальля Гумянюк паведаміла: цяпер можна сьцьвярджаць, што колькасьць вызваленых населеных пунктаў у Херсонскай вобласьці ўжо перавысіла 40.
«Гэтая праца настолькі маштабная, што яшчэ патрабуе ўдакладненьня і канчатковых зьвестак, якія рыхтуе Генэральны штаб. Пакуль мы працягваем пазыцыйныя баі, працягваем замацоўваць за сабой вызваленыя тэрыторыі», — адзначыла яна.
Кіраўніца аб’яднанага каардынацыйнага прэс-цэнтру Сілаў абароны поўдня Ўкраіны падкрэсьліла, што расейцы пакінулі пасьля сябе «шмат вельмі непрыемных сюрпрызаў, у тым ліку замінавалі вялікія ўчасткі мясцовасьці, дарогі, аб’екты крытычнай інфраструктуры і іншыя аб’екты сацыяльнага забесьпячэньня».
«Тут трэба вельмі ўважна падзяляць радасьць і эўфарыю, але ня траціць пільнасьці і ўвагі і памятаць, што ўмацаваньні на левым беразе (куды адышлі расейцы. — РС) яшчэ досыць блізка да тых тэрыторый, якія яны пакінулі, і могуць быць магутныя масаваныя абстрэлы», — падкрэсьліла Натальля Гумянюк.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
