У інтэрвію Evening Standard Бэн Уолес заявіў, што расейскі кіраўнік прыйшоў да гэтай высновы пасьля апошніх паразаў расейскіх войскаў ва Ўкраіне.
«Пуцін толькі што выявіў, што Расея — ня звышдзяржава. Гэта ключавы момант. З аднаго боку, ты паверыў ва ўласны штучны ажыятаж, у парадныя пляцы, дзе лічыў танкі і меркаваў, што яны непераможныя, а на самай справе — гэта ня так».
Кіраўнік Мінабароны Брытаніі лічыць, што расейскія войскі пастаянна лічылі здольнымі на большае, пакуль не прыйшлі паразы. Разам з гэтым, Расея можа кінуць на вайну яшчэ мільёны людзей.
«На кожным кроку недаацэньвалі Ўкраіну і пераацэньвалі Расею. Але ў Пуціна ў запасе ёсьць мільёны людзей, якіх ён можа запхнуць у мясарубку бяз правілаў, без павагі да чалавечых жыцьцяў, да нявінных людзей і цывільнага насельніцтва», — дадаў Уолес.
Калі такая тактыка будзе пасьпяховай, гэта будзе пасланьне ўсяму сьвету, што менавіта так можна выйграваць войны. Але міжнародная супольнасьць, на думку Ўолеса, ня можа гэтага прыняць. Што тычыцца імавернага ядзернага ўдару, які можа нанесьці Пуцін, то па словах брытанскага міністра нават Кітай і Індыя ў гэтым выпадку будуць супраць Расеі.
У апошнія дні контранаступленьне Ўкраіны на паўночным усходзе «ў некаторай ступені запаволілася», але ўсё адно працягваецца, забіраецца ініцыятыва, у прыватнасьці, на чыгунцы, на якую Расея спадзяецца. На Херсоншчыне вызваленьне тэрыторый украінцамі ідзе «павольна, але няўхільна».
З набліжэньнем лютай зімы ўкраінскія войскі экіпаваныя лепш, чым многія расейскія салдаты, у тым ліку маюць начныя прыцэлы, лепшыя радыёстанцыі і цёплы рыштунак. Па словах Уолеса, расейцы сутыкнуліся з кепскім кіраваньнем, а многія генэралы за свае дзеяньні ў сваім жа войску павінны быць арыштаваныя.
Кіраўнік Мінабароны Брытаніі запэўніў, што яго краіна працягне пастаўкі ўзбраеньняў Украіне. Заходніх яе партнэраў не пасварыла нават тое, што Пуцін адключыў газ.
Сам ён ня верыць у тое, што Пуцін скончыць вайну і выведзе свае войскі з Украіны, паколькі той пайшоў «ва-банк».
Бэн Уолес лічыць яшчэ адно вялікай памылкай Пуціна абстрэл украінскай цывільнай інфраструктуры. Ён лічыць, што нападам на невайсковыя аб’екты расейцы толькі істотна скарацілі колькасьць сваёй зброі, зь якой і так маюць праблемы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
