Пра вызваленьне колішняга набліжанага да Лукашэнкі бізнэсоўца Юрыя Чыжа паведаміла «Наша ніва». Камісія па памілаваньні задаволіла хадайніцтва Юрыя Чыжа аб спыненьні крымінальнага перасьледу. Ён ужо на волі.
Памілаваць у Беларусі фармальна можа Аляксандар Лукашэнка.
Раней выданьне з спасылкай на свае крыніцы пісала, што Юрыю Чыжу выставілі абвінавачаньне паводле ч. 4 арт. 209 Крымінальнага кодэксу Беларусі («Махлярства, зьдзейсьненае групай асоб або ў асабліва буйным памеры», пагражала да 10 гадоў пазбаўленьня волі са штрафам).
Афіцыйнай інфармацыі пра вызваленьне Чыжа няма.
Юры Чыж, некалі набліжаны да Лукашэнкі самы ўплывовы бізнэсовец у Беларусі, знаходзіўся пад вартай з 15 сакавіка 2021 году. Яго затрымалі пасьля вяртаньня з Масквы. Разам з Чыжом затрымалі кіраўнікоў некалькіх кампаній — тых, што засталіся ў бізнэсоўца пасьля разгрому ягонай імпэрыі.
Прэтэнзіі ў сілавікоў тады ўзьніклі да топ-мэнэджмэнту «Кварцкрэйдапрама» — прадпрыемства ў Маларыцкім раёне, якое забясьпечвала крэйдай бярозаўскі завод па вырабе будаўнічых матэрыялаў (таксама належыць Чыжу). Таксама нібыта быў затрыманы адзін з кіраўнікоў «Данпрада» — прадпрыемства на Валожыншчыне, якое вырабляла сьвініну.
Нарэшце, прыйшлі і ў «НафтаХімТрэйдынг» — адзін з апошніх бізнэсаў Чыжа, які пасьпяхова працягваў працаваць. У сеткі з 11 заправак, тры зь якіх у Менску, перад гэтым забралі ліцэнзію на продаж паліва.
Раней Юрыя Чыжа ўжо затрымлівалі ў 2016 годзе праз падазрэньне ва ўхіленьні ад выплаты падаткаў у асабліва буйным памеры. Неўзабаве ён выйшаў на волю, у гэты ж час вялося сьледзтва ў дачыненьні да ягонага партнэра Ўладзімера Япрынцава.
Пазьней пачаўся падзел бізнэсу, вынікам чаго стала згортваньне шэрагу буйных праектаў групы кампаній. Цяпер ТАА «Трайпл» у стане ліквідацыі.
