Ва Ўкраіне спынілі крымінальную справу супраць Вадзіма Цітушкі, які ў 2013 годзе напаў на журналістаў, пасьля чаго «цітушкамі» сталі называць хлопцаў спартовага целаскладу, якія за грошы ўдзельнічаюць у вулічных акцыях і мітынгах у інтарэсах пэўных асоб, піша strana.ua.
Цітушку інкрымінавалі разбойныя напады і незаконнае завалоданьне транспартным сродкам. Дасудовае расьсьледаваньне доўжылася з 2018 году, у суд справа была накіраваная ў 2020 годзе. А ў 2022 годзе справу супраць Цітушкі закрылі.
Адвакат Вадзіма Цітушкі Аляксандр Тананакін патлумачыў:
«Справу закрылі ў сувязі з тым, што пракурор накіраваў у суд абвінаваўчы акт з парушэньнем вызначаных для гэтага тэрмінаў, што вядзе да закрыцьця крымінальнага вядзеньня».
Цяпер Вадзім Цітушка плянуе зьвяртацца ў Эўрапейскі суд правоў чалавека з пазовам супраць Украіны. Паводле адваката, з пачатку поўнамаштабнай вайны Вадзім Цітушка служыць ва УСУ.
Цітушка праславіўся 18 траўня 2013 году на акцыях апазыцыі «Уставай, Украіна!». Маладзён нападаў тады на журналістаў. Сам ён сьцьвярджаў, што быў у ахове аднаго з дэпутатаў-апазыцыянэраў, але апазыцыя заяўляла, што ён прыцягваўся ў якасці сілавога прыкрыцьця для праўладнай акцыі. Міліцыя тады распачала крымінальную справу, а суд праз тры месяцы вынес Цітушку прысуд — тры гады ўмоўна.
