У Горадні затрымалі адвакатку з 18-гадовым стажам Юлію Юргілевіч
У яе дома прайшоў ператрус, паведамляе тэлеграм-канал «Пагоня».
Юргілевіч абараняла Алеся Пушкіна, Арцёма Баярскага, Ігара Банцэра. У лютым 2022 году яе выключылі са складу Горадзенскай абласной калегіі адвакатаў нібыта за «сыстэматычныя парушэньні заканадаўства».
Затрымалі журналіста Паўла Мажэйку
Затрымалі кіраўніка горадзенскага «Цэнтру гарадзкога жыцьця» журналіста Паўла Мажэйку. Пра гэта паведамляе @Grodno_grab.
У сакавіку 2021 году Паўла Мажэйку затрымлівалі разам з мастаком Алесем Пушкіным. Тады Мажэйку вызвалілі пасля 72 гадзін.
Павал Мажэйка — вядомы горадзенскі журналіст, адзін зь лідэраў грамадзка-культурнага жыцьця гораду. У 2002 годзе яго асудзілі на два гады хіміі за «паклёп» на Лукашэнку ў артыкуле ў газэце «Пагоня» пра зьнікненьні Захаранкі, Ганчара ды іншых апанэнтаў уладаў. Мажэйка кіраваў «Цэнтрам гарадзкога жыцьця» Горадні, які ўлады ліквідавалі летам 2021 году.
У Менску затрымалі экскурсаводку Сьвятлану Грышкевіч
У «пакаяльным» відэа Сьвятлана кажа, што ў жніўні 2020 году брала ўдзел у пратэстах, а на адной з экскурсій «дапусьціла некарэктныя выказваньні на адрас Лукашэнкі», паведамляе «Медиазона».
Святлана Грышкевіч — менская экскурсаводка і блогерка. У інстаграме яна расказвае пра сваю працу і горад. У лютым яна апублікавала антываенны пост: «Шаноўныя ўкраінцы, сябры. Трымайцеся. Мы з вамі. Вы заўсёды для беларусаў былі і ёсьць прыкладам годных і вольных людзей. Я ня ведаю як дапамагчы, але ўсім сэрцам і думкамі з вамі».
Сьвятлане Грышкевіч прысудзілі 12 сутак арышту.
Затрыманьні ў Кобрыні
Праваабаронцам стала вядома пра затрыманьні АМАПам жыхароў Кобрыні. Паводле папярэдняй інфармацыі, затрымлівалі тых, хто раней удзельнічаў у пратэстах, паведамляе «Вясна». Сярод затрыманых — хлопец Аляксандар і Яўген Папоў. Дома ў Яўгена правялі ператрус, забралі ноўтбук, ягоны тэлефон і частку грошай, якія знайшлі. Дзе ён цяпер, ніхто ня ведае.
У Смаргоні лекара асудзілі на 8 гадоў калёніі
10 чэрвеня праваабаронцы «Вясны» паведамлялі пра затрыманьне ў Смаргоні лекара 1-й кваліфікацыйнай катэгорыі спэцыяліста УГД Яўгена Бужынскага.
Цяпер стала вядома, што лекару прысудзілі да 8 гадоў калёніі за «распальваньне сацыяльнай варожасьці» ў інтэрнэце (арт. 130 КК) і за хабар. Ніякіх падрабязнасьцяў па справе не вядома.
Суды ў Жлобіне
У Жлобіне прайшлі суды над затрыманымі супрацоўнікамі аддзелу ідэалёгіі БМЗ.
Адказную сакратарку газэты «Металург» Марыю Бажынскую пакаралі 20 базавымі штрафу, а сацыёляга Дзьмітрыя Арцёменку арыштавалі на 12 сутак, паведаміў «Белсат».
