Пра гэта паведамляе выданьне Ґрати.
21-гадовы вайсковец кантрактнай службы Шышымарын быў першым расейскім вайскоўцам, прысуджаным ва Ўкраіне пасьля пачатку шырокамаштабнага ўварваньня па абвінавачаньні ў парушэньні законаў і звычаяў вайны. Сьледзтва ўстанавіла, што Шышымарын 28 лютага застрэліў 62-гадовага жыхара вёскі Чупахоўка Сумскай вобласьці Аляксандра Шаліпава.
Расейскі вайсковец пасьля быў узяты ў палон. Суд у траўні прысудзіў яго да пажыцьцёвага зьняволеньня, гэта самае суровае пакараньне ва Ўкраіне, дзе няма сьмяротнага пакараньня.
Вайсковец прызнаў сваю віну і раскаяўся. Ён заявіў, што страляць па мірным жыхары яму загадалі. У чэрвені абарона расейца падала апэляцыю на рашэньне суду, аспрэчыўшы пажыцьцёвы прысуд. Адвакаты падкрэсьлілі, што Шышымарын прызнаў віну і даў прызнальныя паказаньні, а таксама што ён добраахвотна здаўся ў палон.
