«Я падазраю, што вы пачуеце гэта ад шэрагу краін, якія тут прысутнічаюць, і варта разумець, што да Расеі цяпер няма і ня можа быць ранейшага стаўленьня, улічваючы яе агрэсію супраць Украіны», — цытуе словы прадстаўніка замежнапалітычнага ведамства, які суправаджае дзяржсакратара Энтані Блінкена на G20, «Голас Амэрыкі».
Сустрэча міністраў замежных спраў G20 у значнай ступені прысьвечаная намаганьням у пераадоленьню глябальнага крызісу ў сфэры харчовай бясьпекі.
«Падчас нашага старшынства ў Радзе Бясьпекі (ААН) мы заклікалі да дзеяньняў і стварылі „дарожную мапу“, якая вызначае магчымыя дзеяньні краін для вырашэньня крызісу харчовай бясьпекі, які сёньня назіраецца практычна ва ўсіх частках сьвету і ў значнай ступені ў выніку расейскай агрэсіі і наступстваў гэтага», — канстатаваў прадстаўнік Дзярждэпартамэнту.
Голад у сьвеце
У справаздачы ААН аб харчовай бясьпецы і харчаваньні гаворыцца, што каля 2,3 мільярда людзей на плянэце сутыкнуліся зь нястачай харчоў у 2021 годзе, зь іх як мінімум 702 мільёны галадаюць, гэта значыць адчуваюць брак ежы на пастаяннай аснове.
Паводле справаздачы, ежы ў сьвеце пэрыядычна не хапае 31,9% жанчын і 27, 6% мужчын, пры гэтым з пачатку пандэміі COVID-19 разрыў паміж імі павялічыўся на адзін працэнтны пункт. Каля 45 мільёнаў дзяцей да пяці гадоў пакутуюць ад зьнясіленьня (сьмяротнай формы недаяданьня), гэта 6,7% усіх дзяцей на плянэце. Пры гэтым у 39 мільёнаў дзяцей таго ж узросту, ці 5,7%, зафіксавана атлусьценьне.
Больш за палову ўсіх, хто цярпіць ад голаду, жывуць у краінах Азіі, яшчэ каля траціны — у Афрыцы, астатняя частка прыпадае на краіны Лацінскай Амэрыкі і Карыбскага басэйна.
З пачатку пандэміі COVID-19 сытуацыя пагоршылася і працягвае пагаршацца з прычыны вайны ва Ўкраіне і зьмены клімату, робіць выснову ААН.
Расея і Ўкраіна — два найбуйнейшыя сусьветныя вытворцы збожжавых, алейных культур і ўгнаеньняў. Вайна парушыла міжнародныя ланцужкі паставак, прывяла да росту цэнаў на зерне, угнаеньні і энэрганосьбіты, у выніку чаго вырасьлі цэны і на лячэбнае харчаваньне для дзяцей са зьнясіленьнем. Акрамя таго, асабліва ў краінах зь нізкім узроўнем даходу, на ланцужкі паставак уплываюць экстрэмальныя прыродныя зьявы, выкліканыя зьменай клімату.
Усе гэтыя фактары пагражаюць харчовай бясьпецы на Зямлі. Аўтары дакладу прагназуюць, што да 2030 году, нават з улікам аднаўленьня сусьветнай эканомікі, у сьвеце па-ранейшаму будзе галадаць 8% людзей. Гэтая лічба супастаўная са зьвесткамі за 2015 год, калі прымалася праграма ААН па барацьбе з голадам.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
