Пра гэта паведамляе DW.
«Я цьвёрда перакананая, што свабоднае дэмакратычнае грамадзтва мае патрэбу ў свабодных сродках масавай інфармацыі для таго, каб інфармаваць грамадзян і заклікаць да адказнасьці ўлады і ўрады. Усе мы павінны стварыць умовы для таго, каб журналісты маглі бесьперашкодна працаваць», — заявіла Анналена Бэрбак 20 чэрвеня, у відэазвароце да ўдзельнікаў мэдыяканфэрэнцыі Global Media Forum (GMF) у Боне.
«Аўтарытарныя рэжымы па ўсім сьвеце спрабуюць абмежаваць свабоду слова і свабоду СМІ. Яны закрываюць мэдыякампаніі — як гэта здарылася з Deutsche Welle ў Маскве. Яны распаўсюджваюць дэзынфармацыю, запалохваюць супрацоўнікаў СМІ, перасьледуюць журналістаў і не спыняюцца нават перад іх забойствам», — заявіла яна.
Таксама Бэрбак прызнала, што нават у дзяржавах з дэмакратычным ладам журналісты атрымліваюць пагрозы ў сацыяльных сетках, і гэта недапушчальна.
Бэрбак паведаміла, што ў рамках праграмы абароны і падтрымкі журналістаў, якія знаходзяцца пад пагрозай перасьледу, МЗС Нямеччыны будзе падтрымліваць «сьмелых работнікаў СМІ, якім давялося пакінуць сваю радзіму — Афганістан, Украіну, Расею або Беларусь, таму што яны скарысталіся сваім правам на свабоду выказваньня думак».
У працы двухдзённага Global Media Forum у Боне, прысьвечанага абмеркаваньню будучыні журналістыкі, удзельнічаюць больш за 2000 удзельнікаў са 120 краін.
Упершыню пасьля пандэміі COVID-19 мэдыяфорум, які ладзіць DW, праходзіць не онлайн, а ў звычайным фармаце.
