Дарадца Офісу прэзыдэнта Ўкраіны Аляксей Арастовіч заявіў, што па ўсёй лініі фронту расейскія вайскоўцы пачалі рыхтавацца да абароны.
«Толькі ў раёне Ізюму, Севераданецку, Лісічанску, Аўдзееўкі і на запароскім кірунку яны ўсё яшчэ ажыцьцяўляюць спробы наступу. Гэтыя дзеяньні маюць сыстэмны характар, а гэта азначае, што войскі Расеі пачалі патроху вычэрпваць існы наступальны патэнцыял», — паведаміў Аляксей Арастовіч у сваім тэлеграм-канале.
Паводле яго, цяпер «ідзе актыўная гонка бакоў для назапашваньня сіл і сродкаў».
17 траўня намесьніца міністра абароны Ўкраіны Ганна Маляр заявіла, што расейскія войскі ня маюць перавагі ў баях на сушы, але пагрозы авіяабстрэлаў застаюцца.
Што вядома пра апошнія абстрэлы Расеі
Адэская вобласьць
У ноч з 17 на 18 траўня Расея абстраляла з акваторыі Чорнага мора Адэскую вобласьць. Паводле папярэдняй інфармацыі, істотных руйнаваньняў і пацярпелых няма.
На месцы абстрэлу працуе сьледча-апэратыўная група, якая дакумэнтуе наступствы абстрэлаў.
Сумская вобласьць
Зь вечара 18 траўня расейцы абстрэльвалі Сумскі раён, але ўкраінцы адказалі агнём у адказ, як сьцьвярджаюць мясцовыя ўлады
Раніцай абстралялі вёску Дзьмітраўка Ахтырскага раёну. Пацярпелых няма, пацэлілі ў прыватныя дамы мірных жыхароў.
Харкаўская вобласьць
На харкаўскім кірунку расейцы спрабуюць утрымаць пазыцыі, на якія адышлі ў выніку контранаступленьня ўкраінскага войска.
У выніку абстрэлаў вёскі Печанегі Чугуеўскага раёну лёгкія раненьні атрымаў 73-гадовы мужчына. Яшчэ адзін паранены ў вёсцы Цыркуны — 27-гадовы мужчына.
З артылерыі абстрэльваюць Цыркуны, Рускія Цішкі, Чаркаскія Цішкі і Пітомнік.
Днепрапятроўская вобласьць
У выніку абстрэлаў Дняпра пашкоджаны два будынкі. Другая ракета пацэліла ў аб’ект транспартнай інфраструктуры, ён зьнішчаны. Паводле ўладаў, тры асобы атрымалі аскепкавыя раненьні. Усе шпіталізаваныя.
Мікалаеўская вобласьць
Раніцай расейскія ракеты трапілі ў жылыя дамы ў Мікалаеве і ў Інгульскім раёне вобласьці.
Папярэдне вядома, што адзін грамадзянін атрымаў аскепкавыя раненьні.
Данецкая вобласьць
Расейцы абстралялі Аўдзееўку забароненымі фосфарнымі боепрыпасамі. Цалкам зьнішчылі школу № 1. Яе ахоўвалі дзяжурныя, але ім удалося ўратавацца. У школе не было ніводнага вайскоўца ці вайсковай тэхнікі.
У Данецкай вобласьці з 24 лютага расейцы пашкодзілі і зруйнавалі 416 адукацыйных устаноў.
Пад сталымі абстрэламі Бахмут, Салядар і Дробышава.
Луганская вобласьць
На Луганшчыне ў выніку абстрэлаў цалкам без электрычнасьці застаўся 41 населены пункт (больш за 100 тысяч спажыўцоў). Цэнтралізаванае водазабесьпячэньне адсутнічае па ўсёй вобласьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
