«Каму цяпер дзякаваць? Гэта была неабходнасьць па мірных жыхарах бамбіць такімі бомбамі? Гэта трэба быць нелюдзем... Ні сумленьня, ні сораму...» — кажа жыхар Марыюпалю.
«Выратуйце нас ад гэтага! Колькі можна зьдзекавацца з нашых дзяцей, нашых старых, інвалідаў... Дапамажыце ўрэшце спыніць гэтую вайну!» — заклікала жыхарка Марыюпалю.
Тэлеканал «Настоящее время» апублікаваў відэазапіс разьбітага Марыюпалю і размовы зь ягонымі жыхарамі, якія сталі закладнікамі Расеі ў бамбасховішчы заводу «Азоўсталь». Яны кажуць, што ў горадзе шмат жанчын, дзяцей і старых, якія хочуць жыць і выбрацца з-пад бесьперапыннага бамбаваньня.
Яна кажа, што марыюпальцы хочуць жыць у сваім горадзе і ў сваёй краіне.
«Я зьвяртаюся да ўсяго сьвету ад імя ўсіх марыюпальцаў. Дапамажыце нам! Колькі гэта будзе працягвацца? Ад каго нас тут ратуюць, я не разумею. Дапамажыце нам спыніць расейскую агрэсію супраць маёй краіны!» — у адчаі крычыць жанчына.
Іншая жанчына, якая гатуе есьці побач з зруйнаваным домам, кажа: «Страшна... Я дагэтуль не магу сьмяяцца. Толькі сьлёзы».
Жыхары пытаюцца, як доўга яны будуць знаходзіцца ў блякадным Марыюпалі.
«Дзеці ня сьпяць. Яны ўсе дрыжаць ад Расейскай Фэдэрацыі», — дадае яшчэ адна жанчына.
«Я хачу, каб мне дапамаглі. Мае ногі ня ходзяць. Мне патрэбна дапамога. Я сплю ў падвале... Быў прыгожы дом, кватэра добрая была. А цяпер ні кватэры, нічога... Я жыву адна, і няма каму мне дапамагчы», — кажа вельмі старая жанчына.
«Мы хочам бясьпекі. Мы хочам бясьпечна выйсьці адсюль і перабрацца ў бясьпечнае месца», — кажа яшчэ адна жанчына. Паводле яе, з бамбасховішча яны і іхныя дзеці не выходзілі два месяцы.
Марыюпальцы, якім удалося ўцячы зь небясьпечнага гораду, расказваюць, што мусілі праходзіць расейскія «фільтрацыйныя лягеры».
Марыі Ўдавічэнцы 17 гадоў. Яна прызналася, што адразу разумела, што ў лягеры будзе складана. Паводле яе, усе грамадзяне мусілі сядзець у машыне па некалькі дзён — ім забаранялі выходзіць нават па патрэбе.
«Ніколі не забуду размову двух салдат: «Што ты рабіў з тымі, хто не прайшоў фільтрацыю? — Застрэліў дзесяць, а далей не лічыў, нецікава», — расказала Марыя.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
