«Я інвэставаў у Mesto.in для таго, каб зьехаць ад вайны ці дыктатуры было прасьцей. Іміграцыйнага досьведу ў мяне шмат, і штораз узьнікалі складанасьці: зь візамі, дакумэнтамі, банкаўскімі рахункамі, арэндай жыльля, страхоўкамі. Вельмі спадзяюся, што каманда „Месца на карце“ дапаможа новым імігрантам нівэляваць траўму страты дому», — паведаміў сузаснавальнік PandaDoc, вядомы беларускі IT-прадпрымальнік Мікіта Мікада.
Цяпер Mesto.in прапануе рэлякацыю толькі на Балі і Кіпр. Аднак, з словаў Мікіты, надалей сетка будзе пашырацца. Цяпер вывучаюць лякацыі і патрэбу ў іх.
На сайце пазначана, што плятформа прызначаная менавіта для рэлякацыі IT-спэцыялістаў і стартапаў. Яна прапануе поўны комплекс эміграцыйнай падтрымкі, а таксама жыльлё, месца для працы ў каворкінгу, стварэньне супольнасьці і дапамогу ў разьвязаньні праблемаў пры ўладкаваньні на месцы: з падаткамі, рахункамі, школамі і гэтак далей.
Інвэстарамі плятформы, акрамя Мікада, сталі дырэктар прадуктаў Google Андрэй Даронічаў і заснавальнік Davidovs VC Мікалай Давыдаў.
