Як адзначае New York Times, праз страты асабовага складу і збоі сувязі тэрміновыя запыты аб падтрымцы, у тым ліку з паветра, затрымліваюцца. У прыватнасьці, праз 30 хвілін пасьля звароту расейскага падразьдзяленьня па дапамогу зьяўляецца запіс пра тое, што пра падтрымку забыліся.
Радыёперамовы напоўнены паведамленьнямі пра расейскія войскі, якім таксама не хапае крытычных прыпасаў:
«Мне тэрмінова патрэбна запраўка, вада, ежа...»; «Трэба тэрміновая запраўка, тэрміновая запраўка, тэхніка спыняецца на дарозе, просьба запраўкі...»
Акрамя таго, у адной зь перамоў прагучаў загад накрыць жылы квартал Макарава артылерыйскім агнём пасьля выдаленьня «фэрмы» (пэўна, кодавае слова для расейскага асабовага складу або тэхнікі). Гэта можа быць ваенным злачынствам, падкрэсьлівае выданьне.
У мястэчку Макараў на Кіеўшчыне ад дзеяньняў расейскіх захопнікаў разбураны прыкладна кожны другі дом, людзей няма. 22 сакавіка ўкраінскія вайскоўцы вярнулі кантроль над мястэчкам.
Макараў — стратэгічная пазыцыя для абароны Кіева. Расейскія войскі спрабавалі прарвацца, каб атачыць украінскую сталіцу з жытомірскага кірунку.
