Пра гэта ўкраінскай службе Радыё Свабода распавёў журналіст з Хэрсона Канстанцін Рыжэнка, якога таксама шукаюць.
Паводле яго слоў, у расейцаў ёсьць сьпісы актывістаў, якія выступаюць супраць вайны і акупацыі, ці проста выказвалі сваю праўкраінскую пазыцыю. Таксама шукаюць тых, хто фатаграфуе перамяшчэньне расійскай тэхнікі і перадае інфармацыю ўкраінскім сілавікам.
«Апошнія некалькі дзён, калі ў горад завезьлі СОБР і Расгвардыю, прадстаўнікі Расгвардыі пачалі хадзіць па дамах і выбіваць дзеверы актывістам, былым супрацоўнікам СБУ, былым вайскоўцам. Пагражаюць журналістам. Ёсьць інфармацыя, што аднаго журналіста забралі, але гэта неправераная інфармацыя. Мне некалькі разоў перадавалі інфармацыю, што канкрэтна мяне шукаюць. Чамусьці з фотаробатам. Яны заходзілі ў пад’езды на канкрэтныя паверхі, выбівалі канкрэтныя дзьверы і пераварочвалі пэўныя кватэры», — распавёў Радыё Свабода Канстанцін Рыжэнка.
Цяпер расейскія сілавікі ачапілі Дняпроўскі рынак, адзін з найбуйнейшых у горадзе. Ва ўсіх, хто хоча прайсьці на тэрыторыю рынку, ці выйсьці адтуль, правяраюць тэлефоны і глядзяць, ці перадаваў чалавек інфармацыю аб перамяшчэньні расейскай тэхнікі ў чат-бот СБУ, распавёў Канстанцін.
«Акупанты занялі СІЗА, якое раней выкарыстоўвалі як гарадзкі выцьвярэзьнік. Колькі чалавек туды ўжо прывезьлі — я не ведаю і ніхто не ведае. Вельмі шмат затрыманьняў было ў Новай Кахоўцы. Мне мясцовыя актывісты гавораць, што там настолькі шмат затрыманьняў, што ўжо не хапае месцаў у камэрах, і людзей проста зганяюць у гаражы мясцовга аддзяленьня МУС і там трымаюць іх. У іх ёсьць пэўныя сьпісы, і па іх пачалі працаваць. А потым яшчэ вылічваюць тых, хто адначасова стаў актыўным у працэсе вайны», — кажа Рыжэнка.
1 сакавіка расейскія войскі, абстрэльваючы шматпавярхоўкі, распачалі штурм Хэрсона. На наступны дзень расейскія вайскоўцы вылучылі патрабаваньні жыхарам горада, а праз дзень захапілі тэлевежу. Горад да гэтага часу ў акупацыі.
Жыхары выходзяць на мірныя мітынгі супраць акупацыі. 9 сакавіка Генштаб ВСУ паведаміў: «У сувязі з моцным супрацівам жыхароў горада Хэрсон, акупанты спрабуюць увесьці адміністрацыйна-паліцэйскі рэжым, для чаго ў Хэрсонскую вобласьць уведзеныя падразьдзяленьні Расгвардыі, якія зьдзейсьнілі антызаконнае затрыманьне больш як 400 грамадзянаў Украіны».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
