Пра значэньне гэтага кроку піша finanz. ru.
«Мы паралізуем актывы Цэнтральнага банку Расеі. Гэта прывядзе да замарожваньня ягоных транзакцыяў. І гэта зробіць немагчымым для Цэнтрабанку продаж актываў», — сказала Уршуля фон дэр Ляен.
Акрамя таго, пэўныя расейскія банкі адключаць ад сыстэмы SWIFT. «Гэта перашкодзіць ім працаваць па ўсім сьвеце, эфэктыўна заблякуе расейскі экспарт і імпарт», — заявіла фон дэр Ляен.
ЗША разам з саюзьнікамі распаўсюдзяць санкцыі на ўсе 630 млрд даляраў валютных рэзэрваў ЦБ РФ. Пра гэта паведаміў на брыфінгу высокапастаўлены чыноўнік Белага дому, дадаўшы, што гэта заблякуе Цэнтрабанку РФ магчымасьць прадаваць валюту на рынку, падтрымліваючы рубель.
На 1 лютага ЦБ РФ валодаў рэзэрвамі на 630 200 000 000 даляраў, уключаючы 113 500 000 000 даляраў зь ліквіднай часткі Фонду нацыянальнага дабрабыту (ФНБ).
Амаль палова ЗВР (311,2 млрд даляраў) разьмешчана ў замежных каштоўных паперах, чвэрць (151,9 млрд даляраў) — на дэпазытах у замежных камэрцыйных і цэнтральных банках. 132 200 000 000 даляраў з золатавалютных рэзэрваў (21%) прыпадае на золата ў сховішчах ЦБ ўнутры Расеі.
Замарожваньне рэзэрваў такой вялікай эканомікі, як расейская, — беспрэцэдэнтны выпадак, і ён будзе мець «разгромны эфэкт», кажа Тым Эш, стратэг Bluebay Asset Management: «Мы можам убачыць, як рубель абрынецца».
У краінах, якія непасрэдна ўводзяць санкцыі, разьмешчана 39% рэзэрваў. Аднак калі да замарожваньня далучацца Японія і МВФ, то пад «блякадай» апынецца ўжо 56% ЗВР.
Золата, якое захоўваецца ў Расеі і таму абароненае ад фізычнай канфіскацыі, таксама можа аказацца бескарысным: рэалізаваць яго на сусьветным рынку за цьвёрдую валюту санкцыі наўрад ці дазволяць. Гэта можа давесьці долю заблякаваных рэзэрваў да 77%.
У Кітаі, паводле апошняй справаздачы ЦБ (30 чэрвеня 2021 г.), захоўвалася 14,2% рэзэрваў. Аднак ідзецца пераважна пра юані, прыдатныя хіба што для двухбаковага гандлю.
«Санкцыі супраць Банку Расеі могуць аказаць калясальны ўплыў на расейскую эканоміку і банкаўскую сыстэму, падобны да таго, што мы бачылі ў 1991 годзе, — папярэджвае Алена Рыбакова, намесьнік галоўнага эканаміста Інстытуту міжнародных фінансаў. — Гэта можа прывесьці да масавага забіраньня сродкаў укладнікамі і далярызацыі, рэзкага падзеньня [рубля], зьнясіленьня рэзэрваў — і, магчыма, поўнага каляпсу расейскай фінансавай сыстэмы».
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
