18 лютага каля 12:00 на КПП «Шчасьце» ў Луганскай вобласьці пад абстрэл прарасейскіх баевікоў трапіла калёна з гуманітарнай дапамогай Упраўленьня Вярхоўнага камісара ААН па справах уцекачоў, паведаміў у Фэйсбуку галоўнакамандуючы Ўзброенымі сіламі Ўкраіны Валеры Залужны.
Абстрэл вёўся з буйнакалібэрнага кулямёта (каля 50 стрэлаў), мінамёта 82 мм (3 стрэлы), гранатамёта АГС-17 (10 стрэлаў) з населенага пункту Вясёлая Гара. Людзей эвакуавалі ў сховішча. Пацярпелых сярод мірнага насельніцтва і Аб’яднаных сіл няма, паведаміў Залужны. Ён назваў здарэньне «чарговым грубым парушэньнем расейскімі акупацыйнымі войскамі міжнароднага гуманітарнага права і Менскіх пагадненьняў».
Украінская Дзяржаўная служба па надзвычайных сытуацыях паведамляе, што ў выніку абстрэлу прыкладна ў той жа час «невядомымі» з напрамку часова падкантрольнай незаконным узброеным фармаваньням тэрыторыі быў пашкоджаны фасад будынку дзяржаўнай пажарна-ратавальнай часткі ў Шчасьці.
«Інфармацыі аб ахвярах сярод мірнага насельніцтва няма. Таксама ў вёсцы Арцёма снарад трапіў непасрэдна ў жылы дом. Пацярпелых няма. На месцы здарэньня працуюць ратавальнікі», — гаворыцца ў паведамленьні.
Як паведамілі ў штабе Абʼяднаных сіл Украіны, па стане на 14.00 18 лютага ўжо зафіксавана 45 парушэньняў рэжыму спыненьня агню на Данбасе, 34 зь якіх — з ужываньнем зброі, забароненай менскімі пагадненьнямі. Страт ва Ўзброеных сілах Украіны няма. Моцныя абстрэлы, нягледзячы на спыненьне агню, пачаліся ўчора раніцай.
18 лютага так званы кіраўнік самаабвешчанай «ДНР» Дзяніс Пушылін заявіў, што ад сёньняшняга дня пачынаецца масавы выезд насельніцтва «ДНР» у Расею, патлумачыўшы гэта «ўзрастаньнем пагрозы нападу з боку Ўкраіны». Паводле Пушыліна, «згодна з дамоўленасьцю з кіраўніцтвам Расейскай Фэдэрацыі» грамадзянам прапанавана эвакуавацца ў Растоўскую вобласьць, дзе для іх гатовыя месцы прыёму і разьмяшчэньня. У першую чаргу зьехаць прапануюць жанчынам, дзецям і людзям пажылога ўзросту.
Інтэрфакс і мясцовыя жыхары паведамляюць, што ў Данецку запрацавала сырэна грамадзянскай абароны.
Так званы кіраўнік самаабвешчанай «ЛНР» Леанід Пасечнік таксама заклікаў жыхароў у найкарацейшыя тэрміны выехаць на тэрыторыю Расейскай Фэдэрацыі «ў сувязі з эскаляцыяй напружанасьці».
Кіраўнік МЗС Украіны Дзьмітры Кулеба заявіў на гэта, што Ўкраіна «катэгарычна абвяргае паведамленьні расейскай прапаганды пра нібыта наступальныя апэрацыі Ўкраіны ці нейкія дывэрсіі ў хімічнай прамысловасьці».
«Украіна не праводзіць і не плянуе такіх дзеяньняў на Данбасе. Мы цалкам адданыя выключна дыпляматычнаму ўрэгуляваньню», — напісаў Кулеба ў Твітэры.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
