11 лютага ў рамках беларуска-расейскага сумеснага апэратыўнага вучэньня «Саюзная рашучасьць – 2022» асноўныя этапы практычных дзеяньняў войскаў (сіл) разгорнуцца на палігонах «Гожаскі» і «Берасьцейскі», а таксама «на асобных участках мясцовасьці» на тэрыторыі Беларусі, паведамляе прэс-служба Міністэрства абароны.
Учора міністэрства апублікавала мапу на тэрыторыі Беларусі на 10 лютага 2022 году:
11 лютага, паводле Мінабароны:
- На палігоне «Гожаскі» падразьдзяленьні мэханізаванай брыгады Узброеных Сіл Беларусі адпрацоўваюць пытаньні вядзеньня абарончага бою. Падразьдзяленьні СПА ажыцьцяўляюць супрацьпаветранае прыкрыцьцё пунктаў кіраваньня, агнявых пазыцый, раёнаў абароны воінскіх частак і падразьдзяленьняў ад удараў сродкаў паветранага нападзеньня праціўніка.
- На палігоне «Берасьцейскі» падразьдзяленьні сіл спэцапэрацый Узброеных сіл Беларусі, Паветрана-дэсантных войскаў і мотастралковых падразьдзяленьняў Узброеных сіл РФ адпрацоўваюць узяцьце пад ахову вайсковых аб’ектаў, тылавых калёнаў, а таксама ўскрыцьця сховішчаў незаконных узброеных фармаваньняў.
- На ўчастку мясцовасьці «Гомель» падразьдзяленьні Паветрана-дэсантных войскаў Узброеных Сіл Расеі праводзяць розыгрыш выведвальна-пошукавых дзеяньняў па блякаваньні і зьнішчэньні дывэрсійна-выведвальных груп умоўнага суперніка і незаконных узброеных фармаваньняў.
- На ўчастку мясцовасьці «Баранавічы» падразьдзяленьні СПА марской пяхоты Ўзброеных сіл Расеі адпрацоўваюць пытаньні адбіцьця ўдараў сродкаў паветранага нападу суперніка з баявой стральбой. Падразьдзяленьні мэханізаванай брыгады Узброеных сіл Беларусі вядуць навучальны абарончы бой.
- На ўчастку мясцовасьці «Рэчыца» мотастралковыя падразьдзяленьні Ўзброеных Сіл Расеі адбіваюць удары сродкаў паветранага нападу ўмоўнага суперніка, адпрацоўваюць пытаньні захаваньня жывучасьці, вываду і заняцьця абарончых рубяжоў, пераправы воднай перашкоды (р. Прыпяць).
Манэўры праходзяць з 10 па 20 лютага. У першы дзень вучэньняў «Саюзная рашучасьць – 2022» актыўныя дзеяньні праводзіліся на двух палігонах і дзесяці ўчастках мясцовасьці.
Зь сярэдзіны студзеня Расея актыўна перакідала ў Беларусь войскі і вайсковую тэхніку, у тым ліку дывізіён зэнітных ракетна-гарматных комплексаў «Панцыр-С», шматмэтавыя зьнішчальнікі Су-35С, штурмавікі Су-25СМ, зэнітны ракетны комплекс С-400 «Трыумф», комплексы «Іскандэры» і іншае ўзбраеньне.
У ЗША і краінах ЭЗ асьцерагаюцца, што нейкая частка расейскіх войскаў застанецца ў Беларусі. Прадстаўнікі беларускіх і расейскіх уладаў сьцьвярджаюць, што пасьля вучэньняў усе войскі вернуцца ў месцы сталай дыслякацыі.
Дзярждэпартамэнт ЗША таксама выказаў асьцярогу, што Расея можа выкарыстоўваць войскі, якія разьмяшчаюцца ў Беларусі, для нападу на Ўкраіну з поўначы. Начальнік Генштаба ВС Беларусі Віктар Гулевіч раней паведаміў, што вучэньні «носяць абарончы характар» і не нясуць ніякай пагрозы «ні для эўрапейскай супольнасьці ў цэлым, ні для суседніх краін у прыватнасьці».
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
