Група расейскіх незалежных блогераў Conflict Intelligence Team (CIT), якая займаецца расьсьледаваньнем абставінаў збройных канфліктаў па адкрытых крыніцах, прааналізавала матэрыял блогу Digital Forensic Research Lab пры экспэртнай групе Atlantic Council, які выйшаў 18 студзеня.
Блог напярэдадні апублікаваў агляд прыбыцьця расейскіх войскаў у Беларусь. У прыватнасьці, там гаварылася пра выгрузку расейскіх рэактыўных сыстэм залпавага агню «Ўраган» на станцыі Рэчыца Гомельскай вобласьці на поўнач ад Кіева. Пазьней аўтар артыкула Майкл Шэлдан выклаў фатаграфію лягера з вайсковай тэхнікай, якую, як мяркуецца, сфатаграфавалі ў раёне Рэчыцы.
На фатаграфіі група блогераў заўважыла транспартна-зараджальную машыну 9Т452 усё той жа РСЗА «Ураган».
Карыстальнік Твітэру @danvan71 зрабіў геалякацыю падобнага кадра на відэа з TikTok на шашы М10 у раёне прыпыначнага пункту «Іванаўка». Conflict Intelligence Team праверыла і пацьвердзіла сапраўднасьць дадзеных.
Адтуль крыху больш за 40 км да мяжы з Чарнігаўскай вобласьцю Ўкраіны і каля 90 км — з Кіеўскай. CIT адзначае, што ў гэтым раёне няма палігонаў, заяўленых для расейска-беларускіх вучэньняў «Саюзная рашучасьць», якія маюць прайсьці ў лютым.
Зьяўленьне расейскай тэхнікі ў непасрэднай блізкасьці ад мяжы з Кіеўскай вобласьцю выклікае асаблівыя асьцярогі ў сувязі з заявамі крыніц CNN, паводле якіх ёсьць разьведдадзеныя, што расейскія войскі могуць паспрабаваць узяць Кіеў і ажыцьцявіць зьмену ўлады ва Ўкраіне.
«Справа ў тым, што ўсе асноўныя ўрадавыя будынкі ў Кіеве знаходзяцца на заходнім беразе Дняпра, а магчымы наступ з поўначы дазваляе не пераадольваць такую значную водную перашкоду (у адрозьненьне ад наступу з боку расейска-ўкраінскай мяжы)», — падкрэсьлівае група.
Пры гэтым CIT ня ведае, пра якія маштабы канцэнтрацыі сілаў на поўнач ад Кіева ідзе гаворка.
«Як мінімум частка расейскіх сілаў, якія ўступілі ў Беларусь, накіраваліся да заяўленых месцаў правядзеньня вучэньняў (напрыклад, у Берасьце каля мяжы з Польшчай). На гэты момант нам здаецца верагодным, што мэта гэтай канцэнтрацыі — прымусіць украінскае камандаваньне трымаць частку сілаў на заходнім беразе Дняпра для прыкрыцьця Кіева, што абмяжуе магчымасьці процідзеяньня патэнцыйнай расейскай апэрацыі на ўсходзе Ўкраіны», — такую выснову зрабілі ў CIT.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
