Здарэньне адбылося ў ноч з 7 на 8 студзеня недалёка ад будынку Цэнтральнага РУУС. Пра затрыманьне падазраванага паведамляе агенцтва «Менск-Навіны» са спасылкай на намесьніка міністра ўнутраных спраў Генадзя Казакевіча.
Мянчук быў затрыманы 13 студзеня супрацоўнікамі Цэнтральнага РУУС Менску пасьля падрыву з выкарыстаньнем двух самаробных выбуховых прыстасаваньняў кіёску «Табакерка» па Старавіленскім тракце. Дарэчы, гэта былі тыя ж патрульныя, машына якіх была пашкоджаная ў ноч на 8 студзеня, — заявіў Казакевіч.
У мужчыны канфіскавалі кампутарную тэхніку з інструкцыямі па вырабе выбуховых рэчываў і самаробных выбуховых прыстасаваньняў, а таксама іх кампанэнты і гатовыя «вырабы». Акрамя таго, Казакевіч адзначыў, што ўстаноўлена дачыненьне затрыманага да пашкоджаньня яшчэ аднаго кіёска ў кастрычніку 2020 году, а таксама да падрыву яшчэ двух выбуховых прыстасаваньняў 1 студзеня каля Цэнтральнага РУУС.
У Сьледчым камітэце паведамілі, што дзеяньні падазраванага кваліфікаваныя паводле артыкула 289 КК (акт тэрарызму, учынены паўторна).
Паведамляецца, што затрыманы дае прызнальныя паказаньні.
