Яго цытуе ТГ-канал МУС Беларусі.
Хадайніцтва грамадзяніна Польшчы Эміля Чэчкі аб наданьні статусу ўцекача прынята да разгляду, заявіў начальнік дэпартамэнту грамадзянства і міграцыі МУС Беларусі Аляксей Бягун.
«У органы ўнутраных справаў з Памежнай службы Беларусі ў адпаведнасьці з законам „Аб наданьні замежным грамадзянам і асобам без грамадзянства статусу ўцекача“ паступіла хадайніцтва грамадзяніна Польшчы Эміля Чэчкі аб наданьні дадатковай абароны або прытулку. Хадайніцтва прынятае да разгляду, будзе прынятае законнае рашэньне», — заявіў прадстаўнік ведамства.
Зь ягоных словаў, тэрмін разгляду такіх хадайніцтваў да 6 месяцаў, а пры неабходнасьці можа быць прадоўжаны яшчэ на 3 месяцы.
Польскі салдат Эміль Чэчка перайшоў мяжу 17 сьнежня і папрасіў палітычнага прытулку ў Беларусі. Ён нібыта «ня згодны з палітыкай Польшчы» стасоўна мігранцкага крызісу і практыкай негуманнага абыходжаньня зь мігрантамі.
Польскі бок у сваю чаргу зьвяртае ўвагу, што салдат меў праблемы з законам на радзіме, злоўжываў алькаголем і наркотыкамі.
Праваахоўныя органы Польшчы завялі на яго крымінальную справу за дэзэртырства.
