Праваабаронцы паведамляюць, што Ганна Баран, Юлія Лаптановіч, Уладзімер і Кацярына Ганчаровы абвінавачваюцца паводле новага артыкула, на падставе якога ў іх адбыліся ператрусы.
Цяпер, акрамя артыкула 342 КК (арганізацыя і падрыхтоўка дзеяньняў, што груба парушаюць грамадзкі парадак), фігурантам дадалі 369-ы крымінальны артыкул (абраза прадстаўніка ўлады). Калі першай справай займаўся ГУБАЗіК, гэтым разам да працэсу падключыўся Камітэт дзяржбясьпекі.
14 кастрычніка вобшук прайшоў у Пружанах у сямʼі Лаптановічаў. Па «карагоднай справе» на 2,5 года калёніі асуджаны бацька траіх дзяцей Ігар Лаптановіч, ягоная жонка Юлія — на 3 гады «хатняй хіміі». Цяпер затрыманая і жанчына, яна ў берасьцейскім СІЗА № 7. Дзеці засталіся з бабуляй.
Ганну Баран таксама зьмясьцілі ў СІЗА-7, яе ўжо наведала адвакатка.
Па 369-м артыкуле праходзіць і сямʼя Ганчаровых. Уладзімера супрацоўнікі ГУБАЗіК яшчэ летам затрымалі разам з жонкай і малалетнімі дзецьмі. Падчас допыту апэратыўнікі з УУС Маскоўскага раёну чатыры гадзіны трымалі дзяцей у калідоры. Пасьля ўсіх перавезьлі ў Сьледчы камітэт і там таксама дапытвалі чатыры гадзіны. Сям’ю адпусьцілі, а Ўладзімера перавялі ў ІЧУ Кобрыні, адтуль — у Берасьцейскі СІЗА, дзе ён застаецца з 14 ліпеня.
Судовы працэс па «карагоднай справе» над дзявятай групай жыхароў Берасьцейскай вобласьці адновіцца 25 кастрычніка.
Агулам за акцыю пратэсту 16 верасьня ў Берасьці ўжо асуджаныя звыш 80 чалавек, падазраванымі праходзяць больш за сотню.
