Пра гэта паведамляе DW.
На парлямэнцкіх выбарах у Нямеччыне перамогу можа атрымаць як кансэрватыўны блок Хрысьціянска-дэмакратычнага саюзу і Хрысьціянска-сацыяльнага саюзу (ХДС / ХСС), так і Сацыял-дэмакратычная партыя Нямеччыны (СДПН).
Паводле дадзеных апытаньняў выбарнікаў, праведзеных сацыялягічнай службай Infratest dima, абедзьве партыі набіраюць па 25% галасоў. Гэтыя лічбы былі апублікаваныя адразу пасьля закрыцьця ўчасткаў для галасаваньня ў нядзелю, 26 верасьня,
На трэцім месцы — партыя «Саюз-90 /"зялёныя"», якая набрала 15% галасоў. Правапапулісцкая партыя «Альтэрнатыва для Нямеччыны» і Свабодная дэмакратычная партыя (СвДП) набралі па 11%. Па дадзеных Infratest dimap, у парлямэнт таксама праходзіць Левая партыя. За яе прагаласавалі 5% выбарнікаў.
Экзыт-пол, зроблены на замову тэлеканалу ZDF, дае крыху іншы расклад. Паводле яго на першым месцы — сацыял-дэмакраты (26% галасоў), у ХДС / ХСС — 24%. «Альтэрнатыва для Нямеччыны» атрымала 10%. «Зялёныя» — 14,5%, «Свабодныя дэмакраты» — 12%, «Левыя» — 5%.
Канцлерка Ангела Мэркель застанецца на сваёй пасадзе, пакуль не будзе абраны яе пераемнік або пераемніца і сфармаваны новы ўрад Нямеччыны.
Нямецкі парлямэнт налічвае не менш за 598 дэпутатаў. Фармуецца ён па зьмяшанай сыстэме. Палова месцаў адводзіцца кандыдатам, якія былі абраныя ў 299 аднамандатных акругах простай большасьцю галасоў, гэта значыць па мажарытарнай сыстэме. Другая палова разьмяркоўваецца паміж кандыдатамі, якія прайшлі ў бундэстаг па партыйных сьпісах, у залежнасьці ад таго, колькі галасоў атрымала тая ці іншая партыя.
На працягу некалькіх тыдняў паступалі паведамленьні пра тое, што рэкордная колькасьць выбарнікаў прагаласавала па пошце. Адна з прычынаў — пандэмія каранавірусу. Доля такіх выбаршчыкаў можа скласьці каля 40%.
