У Warsaw Freedom Orchestra ўваходзяць беларускія эмігранты розных гадоў, сярод іх ёсьць і людзі, якія пакінулі радзіму з палітычных матываў пасьля сфальсыфікаваных выбараў 2020 году, піша Эўрарадыё.
Кіраўнік аркестру Сяржук Доўгушаў расказаў, што песьню выканалі, каб падтрымаць калегаў-музыкаў, якіх безь віны трымаюць за кратамі і нават не вядуць у дачыненьні да іх ніякіх сьледчых дзеяньняў.
У рэпэртуары аркестру — творы беларускіх кампазытараў ад эпохі барока да XXI стагодзьдзя. Гэта гімны, запісаныя ў зборніках XVI стагодзьдзя, палянэзы Агінскага, маршы і песьні кампазытараў XIX і XX стагодзьдзяў, творы сучасных кампазытараў, а таксама апрацоўкі папулярных песень беларускай рэвалюцыі.
