Некалькі дэпутатаў польскага Сэйму з так званай «Левіцы» накіраваліся да мяжы, каб на месцы разабрацца ў сытуацыі зь мігрантамі. Там жа зьявіўся і член клюбу «Грамадзянская кааліцыя» Францішак Стэрчэўскі. Раней, у панядзелак ён дапамог іракцу, які перасек польскую мяжу. «Той блукаў па лесе 5 дзён, быў стомлены, галодны і сасьмяглы. Мы далі яму есьці і піць», — напісаў ён у Facebook.
У аўторак Францішак Стэрчэўскі, дэпутат з Познані, паспрабаваў даставіць торбу з гуманітарнай дапамогай мігрантам, якія разьмясьціліся на мяжы. Памежнікі не прапусьцілі яго, тады ён паспрабаваў прарваць ачапленьне. Аднак упаў і быў спынены.
«Дэпутат Францішак Стэрчэўскі, затрыманы салдатамі і афіцэрамі памежнай службы, у парушэньне яго недатыкальнасьці», — паведаміў Фонд «Выратаваньне» ў Twitter.
- Група афганскіх мігрантаў некалькі дзён бадзяецца ў ваколіцах вёскі Горны Ўснар на мяжы. Першапачаткова ў ёй было 32 чалавекі, цяпер засталося 24. Мігрантаў не пускаюць у Польшчу, а на мяжы паставілі калючы дрот. Польскія ўлады цьвердзяць, што абвастрэньне сытуацыі на мяжы завязана з дзеяньнямі рэжыму Аляксандра Лукашэнкі, які спрабуе дэстабілізаваць сытуацыю ў Польшчы і Літве. Адказ польскай улады на гэтую сытуацыю раскрытыкавалі некаторыя апазыцыйныя палітыкі Польшчы.
