«У першую гадавіну сфальшаваных прэзыдэнцкіх выбараў у Беларусі ўрад Злучаных Штатаў прыняў рашучыя меры ў дачыненьні да сaрака чатырох фізычных і юрыдычных асобаў, каб прыцягнуць Аляксандра Лукашэнку і яго рэжым да адказнасьці за гвалтоўныя рэпрэсіі супраць беларусаў унутры краіны і за яе межамі», — гаворыцца ў заяве дзяржсакратара ЗША Энтані Блінкена, апублікаванай у сацыяльных сетках амбасады ЗША ў Беларусі.
Дзяржсакратар тлумачыць, што гэтыя крокі зробленыя з прычыны «працяглага грубага ігнараваньня правоў чалавека беларускімі ўладамі і невыкананьня Беларусьсю сваіх абавязаньняў у міжнародным заканадаўстве ў галіне правоў чалавека».
Дзяржсакратар удакладняе, што новыя санкцыі скіраваныя, сярод іншага, на юрыдычных і фізычных асобаў, «у тым ліку на дзяржаўныя прадпрыемствы, прадстаўнікоў улады і іншых, хто падтрымлівае рэжым, садзейнічаюць яго гвалтоўным рэпрэсіям супраць беларускага народу і парушаюць вяршэнства закону».
ЗША таксама выказалі падтрымку санкцыйным крокам Вялікай Брытаніі, Канады і Эўразьвязу. «Дэмакратычныя краіны мацнейшыя, калі яны разам», — гаворыць дзяржсакратар.
Энтані Блінкен нагадвае пра тое, што год таму жыхары Беларусі ў рэкорднай колькасьці выказалі сваё імкненьне да дэмакратыі і жаданьне пераменаў. Рэжым, замест таго, каб улічыць іх галасы, «падманам абвясьціў перамогу і распачаў кампанію гвалту і рэпрэсій. Ад таго часу Лукашэнка імкнецца замацаваць сваю ўладу за кошт беларускага народу».
ЗША адзначаюць, што рэпрэсіі здабылі транснацыянальны характар: беларусы за мяжой таксама сутыкаюцца з запалохваньнем. «Гэтыя рэпрэсіі паказваюць абуральнае ігнараваньне міжнародных нормаў, як прадэманстравала нахабная прымусовая пасадка рэйса 4978 Ryanair з мэтай арышту беларускага журналіста i небясьпечная спроба запалохаць ЭЗ, у прыватнасьці нашага саюзьніка Літву, — арганізаваўшы нелегальныя патокі мігрантаў празь мяжу Беларусі. Адбылася спроба прымусовай рэпатрыяцыі беларускай алімпійкі Крысьціны Ціманоўскай, якой Польшча прапанавала гуманітарную візу». ЗША разам са сваімі саюзьнiкамi i партнэрамі адказваюць на гэтыя пагрозы.
Злучаныя Штаты зноў заклікаюць беларускія ўлады:
- спыніць рэпрэсіі,
- неадкладна вызваліць усіх палітвязьняў,
- пачаць сапраўдны дыялёг з дэмакратычнай апазыцыяй і грамадзянскай супольнасьцю,
- правесьці свабодныя і сумленныя выбары пад міжнародным назіраньнем.
«Мы будзем працягваць працаваць зь міжнароднай супольнасьцю, каб прыцягнуць да адказнасьці вінаватых у парушэньнях правоў чалавека ў Беларусі», — запэўнівае дзяржсакратар ЗША.
- У гадавіну прэзыдэнцкіх выбараў у Беларусі прэзыдэнт ЗША падпісаў выканаўчы загад аб блякаваньні маёмасьці дадатковых асобаў, датычных да сытуацыі ў Беларусі.
- Уводзяцца санкцыі ў дачыненьні да ААТ «Беларуськалій», які, як лічыць амэрыканскі бок, зьяўляецца «крыніцай незаконнага ўзбагачэньня рэжыму»;
- Санкцыі да Нацыянальнага алімпійскага камітэту Беларусі, які «абвінавачваецца ў адмываньні грошай, ухіленьні ад санкцыяў і абыходзе візавых забаронаў;
- У санкцыйны сьпіс таксама ўключаныя «вядомыя бізнэсоўцы, якія падтрымліваюць рэжым Лукашэнкі, а таксама 15 кампаніяў, зь якімі яны зьвязаны.
