Фэстываль будзе гран-фіналам Міжнароднага тыдня беларускай культуры.
На сцэне выступяць: Маргарыта Ляўчук, Ilo&friends, новы праект Сяргея Доўгушава, Аляксея Варсобы і Андрэя Еўдакімава Isna Trio, Вераніка Круглова і Валерыя Дэле, Naviband і зорка з Украіны Alina Pash.
Арганізатары фэсту зазначаюць, што «Tutaka» — гэта ня толькі музыка і канцэрты, гэта таксама беларуская культура і мастацтва ў поўнай іх разнастайнасьці.
У межах фэсту пройдуць дыскусіі пра сучасную беларускую культуру. Ганаровы патранат над фэстывалем узяў прэзыдэнт Польшчы Анджэй Дуда. У ганаровы камітэт увайшоў офіс Сьвятланы Ціханоўскай. Асноўны партнэр — Беларуская Рада культуры.
«Няхай гэты Фэстываль усіх свабодных беларусаў стане выказваньнем нашай салідарнасьці з братамі і сёстрамі, якія знаходзяцца ў Беларусі і ўсё яшчэ разьлічваюць на нашу падтрымку і салідарнасьць», — пішуць арганізатары фэсту з фундацыі «Тутака».
Яны таксама падкрэсьлілі:
«Фэстываль стане нагодай адзначыць і ўшанаваць памяць гадавіны выбуху беларускай грамадзянскай рэвалюцыі, падчас якой рукі злачыннага рэжыму шмат разоў былі заплямленыя беларускай крывёй. Але зь іншага боку, гэта будзе і гадавіна будаваньня вялікай нацыі. Тады як многія з нас наагул сумняваліся, што гэта магчыма, 2020 год стаў нацыятворчым выбухам, які ўжо „не спыніць“!»
