Такое рашэньне мясцовыя ўлады вымушаныя былі ўхваліць па выніках нарады ў Міністэрстве інфраструктуры Ўкраіны, на якой абмяркоўвалася пытаньне аб рэалізацыі праектаў абнаўленьня пасажырскага транспарту пры ўдзеле фінансаваньня Эўрапейскага інвэстыцыйнага банку.
У тэндэры на закупку аўтобусаў для Мікалаева ўдзельнічалі два прадпрыемствы — ТАА «Сучасні вантажівки» ды Чарнігаўскі аўтазавод. У чэрвені па выніках вывучэньня прапаноў пераможцам меліся абвясьціць першае прадпрыемства, якое зьяўляецца адным з дылераў тэхнікі Менскага аўтамабільнага заводу. Але вынікаў тэндэру не абвясьцілі, чакаючы цэнтралізаванага рашэньня ўладаў у сувязі з увядзеньнем санкцый супраць беларускага прадпрыемства.
«Праз санкцыі, накладзеныя Эўрапейскім Зьвязам на беларускія прадпрыемствы, ухвалена рашэньне абвясьціць новы тэндэр і запрасіць больш удзельнікаў», — паведамілі ў Мікалаўскай гарадзкой радзе.
Сёлета ў красавіку мэр Львова Андрэй Садавы заявіў пра намер правесьці новы тэндэр для вызначэньня іншага пастаўшчыка аўтобусаў, якія гарадзкія ўлады купляюць за грошы Эўрапейскага інвэстыцыйнага банку. У канцы 2020 году яго выйграў Менскі аўтамабільны завод, які мусіў паставіць 100 аўтобусаў. Пасьля выбараў у Беларусі ўлада Львова не захацела такім чынам «фінансаваць рэжым».
Украінскі рынак для беларускіх вытворцаў пасажырскай, грузавой і спэцыяльнай тэхнікі быў ці не найбольшым сярод блізкіх суседзяў.
Дзякуючы дзяржаўнай праграме, зацьверджанай украінскім урадам для замены грамадзкага транспарту, у фінансаваньні якой былі задзейнічаныя і крэдыты двух эўрапейскіх банкаў, геаграфія беларускіх аўтобусаў і тралейбусаў імкліва пашыралася з захаду на ўсход і з поўначы на поўдзень Украіны. Дылеры беларускай тэхнікі перамагалі на большасьці тэндэраў. Зьявіліся ва Ўкраіне і зборачныя вытворчасьці беларускіх тралейбусаў, камунальнай і сельскагаспадарчай тэхнікі.
У грузавым транспарце Менскі аўтамабільны завод увогуле трымае траціну ўкраінскага рынку, апярэджваючы ўсясьветныя брэнды Mercedes-Benz, MAN, Scania, Ford Trucks, Volvo Trucks і ўкраінскі КрАЗ.
