Графік экспарту на трэці квартал 2021 году прадугледжвае пастаўку 51,86 млн тонаў расейскай нафты (плян на II квартал — 55,3 млн тонаў), аднак не прадугледжвае паставак на «Нафтан», сьведчыць дакумэнт, зь якім азнаёміўся Інтэрфакс.
У дакумэнце заяўленыя пастаўкі ў расейскія порты Новарасійск, Прыморск, Усць-Лугу, Козьміна. Пойдзе нафта ў напрамку Чэхіі, Славаччыны, Вугоршчыны, Нямеччыны, Польшчы, Кітаю.
Згодна з дакумэнтам, у трэцім квартале не прадугледжана паставак на Наваполацкі НПЗ (ААТ «Нафтан»), і толькі 2,36 млн тонаў —на Мазырскі НПЗ. У другім квартале ў графіку значыліся пастаўкі на Наваполацкі НПЗ і Мазырскі НПЗ у аб’ёме па 2,25 млн тонаў.
Міністэрства фінансаў ЗША 19 красавіка адмяніла дзейны з кастрычніка 2015 году мараторый на санкцыі ў дачыненьні да канцэрну «Белнафтахім», яго гандлёвага прадстаўніцтва ў ЗША і сямі прадпрыемстваў, якія ўваходзяць у яго склад, у прыватнасьці НПЗ «Нафтан». Паводле дадзеных міністэрства, да завяршэньня 45-дзённага пэрыяду 3 чэрвеня 2021 году былі дазволеныя толькі тыя апэрацыі з гэтымі кампаніямі, якія неабходныя для завяршэньня супрацоўніцтва зь імі.
Буйныя расейскія нафтавыя кампаніі ў траўні перасталі адпраўляць сыравіну на «Нафтан», увесь аб’ём быў пастаўлены іншымі нетракарыстальнікамі (гэта значыць — тымі, якія не ўваходзяць, паводле тэрміналёгіі афіцыйнай статыстыкі, у лік асноўных).
