СБУ правяла антытэрарыстычныя вучэньні ва ўсіх памежных зь Беларусьсю абласьцях. Якія навыкі адпрацоўвалі?

У кожнай з абласьцей спэцыяльныя падразьдзяленьні адпрацоўвалі розныя сцэнары.

Паводле прэсавага цэнтру СБУ, у Валынскай вобласьці адпрацоўваліся дзеяньні ў выпадку захопу «дывэрсантамі» вайсковых частак і складоў з боепрыпасамі. Вучэньні праводзіліся ва ўмовах, максымальна набліжаных да рэальных, з выкарыстаньнем узбраеньня і спэцыяльнай тэхнікі. На іх адпрацоўваліся мэханізмы міжведамаснага ўзаемадзеяньня для папярэджаньня тэрарыстычных дзеяньняў на вайсковых аб’ектах.

Тыднем раней на антытэрарыстычных вучэньнях у Ровенскай вобласьці спэцыяльныя падразьдзяленьні Службы бясьпекі і іншых праваахоўных органаў адпрацоўвалі затрыманьне «тэрарыстаў», якія захапілі будынак гаспадарчага суду.

Паводле легенды вучэньняў у Чарнігаўскай вобласьці, што адбыліся ў канцы сакавіка, група ўмоўных «тэрарыстаў» пранікла на прадпрыемства і захапіла яго супрацоўнікаў у закладнікі. Да гэтых трэнаваньняў былі залучаныя таксама падразьдзяленьні службы ў пытаньнях надзвычайных сытуацый, памежнікаў, Нацыянальнай гвардыі, Узброеных сілаў, а таксама прадстаўнікі органаў выканаўчай улады і мясцовага самакіраваньня.

У сярэдзіне сакавіка такія вучэньні прайшлі і ў Жытомірскай вобласьці. Там адпрацоўвалі альгарытм супрацьдзеяньня дывэрсійна-тэрарыстычным групам і правяралі ўзровень контрадывэрсыйнай абароненасьці аб’ектаў інфраструктуры.

У Херсоне ад сёньня пачалі адпрацоўваць абарону марской прыбярэжнай зоны і адміністрацыйнай мяжы з анэксаваным Расеяй Крымам.

З канца сакавіка Расея актывізавала перамяшчэньне сваіх войскаў і тэхнікі ўздоўж усёй мяжы з Украінай і ў акупаваным Крыме. Дасьледнікі і журналісты спрабавалі вызначыць геалякацыю гэтых здымкаў і зрабіць высновы пра намеры расейскага вайсковага камандаваньня і Крамля. Адна з галоўных вэрсій палягае ў тым, што гэта дэманстрацыя сілы, каб запалохаць Кіеў і даслаць сыгнал Захаду, што Расея гатовая вельмі хутка перакінуць сілы для наземнай ваеннай апэрацыі.

Увесь гэты час міжнародная супольнасьць заклікае Расею спыніць эскаляцыю на мяжы з Украінай.

На пачатку красавіка Ўкраіна заявіла, што разглядае падрыхтоўку Беларусі і Расеі да правядзеньня супольных вайсковых вучэньняў «Захад-2021» і «эскаляцыю расейскага ўплыву на Беларусь» як пагрозу бясьпецы ў рэгіёне.