«Справу студэнтаў і выкладчыкаў» перадалі для накіраваньня ў суд. У ёй 12 абвінавачаных

Галоўнае сьледчае кіраваньне Сьледчага камітэту скончыла расьсьледаваньне крымінальнай справы ў дачыненьні асобаў, якія «арганізавалі акцыі пратэстаў у студэнцкім асяродзьдзі розных ВНУ Менску». У якасьці абвінавачаных у справе прыцягнулі 12 чалавек. Сярод іх студэнты, выкладчыца і сябар Каардынацыйнай рады. Пратэставыя акцыі, паводле СК, «абмяркоўваліся са Сьвятланай Ціханоўскай».

Абвінавачаныя нібыта зьяўляліся каардынатарамі на месцах, адміністравалі тэматычныя тэлеграм-каналы, асабіста заклікалі да ўдзелу ў акцыях пратэсту, выраблялі і распаўсюджвалі ўлёткі з заклікамі, кіравалі ўдзельнікамі, займаліся іх падрыхтоўкай і матэрыяльным забесьпячэньнем, паведамлялі аб перасоўваньнях міліцыянтаў.

У матэрыялах справы гаворыцца пра тое, што падчас правядзеньня пратэставых акцый студэнты блякавалі калідоры і лесьвічныя маршы, ускладнялі праход студэнтаў, выкладчыкаў і наведнікаў, стваралі шум. У выніку парушалася нармальная праца ўстановы адукацыі і зрываўся адукацыйны працэс. Дзеяньні спынілі супрацоўнікі КДБ.

ГЛЯДЗІЦЕ ТАКСАМА:

Студэнцкія арганізацыі беларускіх ВНУ аб’ядналіся ў адну асацыяцыю

У межах папярэдняга расьсьледаваньня праводзіліся ператрусы, падчас якіх канфіскавалі мабільную і кампутарную тэхніку. Фігурантам прад’явілі абвінавачаньні паводле ч. 2 арт. 17 і ч. 1 арт. 342 (арганізацыя дзеяньняў, што груба парушаюць грамадзкі парадак, учыненыя групай асобаў) Крымінальнага кодэксу Рэспублікі Беларусь. З санкцыі пракурора абвінавачаныя знаходзяцца пад вартай:

• Марыя Каленік, студэнтка БДАМ;
• Ксенія Сырамалот, студэнтка БДУ;
• Кася Будзько, студэнтка БДПУ;
• Яна Арабейка, студэнтка БДПУ;
• Ягор Канецкі, студэнт БДУ;
• Глеб Фіцнэр, студэнт МДЛУ;
• Ільля Трахтэнбэрг, адлічаны студэнт БДУ;
• Вікторыя Гранкоўская, адлічаная студэнтка БНТУ;
• Анастасія Булыбенка, адлічаная студэнтка БНТУ;
• Вольга Філатчанкава, выкладчыца БДУІР (ч. 1 арт. 342 КК);
• Алана Гебрэмарыям, выпускніца БДМУ, сябра Каардынацыйнай рады, прадстаўніца Ціханоўскай у справах моладзі і студэнтаў (ч. 1 арт. 342 КК);
• Тацяна Якельчык, студэнтка мэхмату БДУ (арт.342 КК).

Крымінальную справу перадалі пракурору для накіраваньня ў суд. Праводзіцца праца па выяўленьні і прыцягненьні да адказнасьці іншых удзельнікаў акцый.

ГЛЯДЗІЦЕ ТАКСАМА:

«Зіма ваша — вясна наша». Што агульнага паміж беларускімі пратэстамі і польскай барацьбой супраць камуністаў

ГЛЯДЗІЦЕ ТАКСАМА:

З прафэсарам Горадзенскага ўнівэрсытэта, якія напісаў у жніўні адкрыты ліст Лукашэнку, не працягнулі кантракт

ГЛЯДЗІЦЕ ТАКСАМА:

Пасьля пратэстаў пацярпелі 113 выкладчыкаў і навукоўцаў. Палове зь іх дапамаглі ў працаўладкаваньні