Як паведамляе КР у сваім тэлеграм-канале, Мортан адзначыла, што ўрад Вялікай Брытаніі заклікаў і заклікае цяперашнюю ўладу Беларусі спыніць рэпрэсіі ў дачыненьні да пратэстоўцаў і незалежных СМІ, а таксама прыцягнуць да адказнасьці вінаватых у парушэньнях.
«Урад Вялікай Брытаніі зацікаўлены ў павелічэньні падтрымкі і разьвіцьці грамадзянскай супольнасьці Беларусі, незалежных СМІ і адукацыйных інстытутаў у Беларусі», — напісала Мортан.
Адзначаецца, што Вялікая Брытанія была сярод першых краінаў, якія апэратыўна зрэагавалі на рэпрэсіі пасьля прэзыдэнцкіх выбараў. Брытанскі ўрад садзейнічае разгляду пытаньняў па Беларусі ў агенцтвах ААН для таго, каб падтрымаць эканамічнае разьвіцьцё краіны, лідэрскі патэнцыял жанчын і садзейнічаць абароне ўразьлівых груп насельніцтва.
Вялікая Брытанія таксама мае намер падтрымаць акадэмічную супольнасьць Беларусі. «Мы ведаем пра цяжкасьці, зь якімі сутыкаюцца студэнты і выкладчыкі, якіх перасьледуюць за імкненьне да дэмакратыі ў Беларусі. Мы працуем над пашырэньнем падтрымкі для студэнтаў і адукацыйных устаноў у Беларусі і шукаем магчымасьці павялічыць колькасьць стыпэндый Chevening для беларусаў», — падкрэсьліла брытанскі міністар у справах Эўрапейскага суседзтва і Амэрыкі.
