Працэс ідзе за зачыненымі дзьвярыма.
Tut.by стала вядома, што прысуд абвесьцяць сёньня а 16:00 у адкрытым рэжыме. На яго агучваньне змогуць прыйсьці сваякі і калегі падсудных.
Суд у справе журналісткі парталу Tut.by Кацярыны Барысевіч і лекара Арцёма Сарокіна пачаўся ў Менску 19 лютага — амаль праз тры месяцы пасьля іх затрыманьня.
І Барысевіч, і Сарокіна вінавацяць у выдаваньні мэдычнай тайны Рамана Бандарэнкі, які загінуў ад рук невядомых. Крымінальную справу па факце яго сьмерці завялі амаль адначасова з пачаткам гэтага працэсу, яе падрабязнасьцяў не публікуюць. Вядома толькі, што сілавікоў сярод падазраваных у забойстве Бандарэнкі няма.
Працэс ідзе ў Доме правасудзьдзя на вуліцы Сямашкі. Суд Маскоўскага раёну, у якім павінны былі судзіць Барысевіч і Сарокіна, занялі працэсам Віктара Бабарыкі.
У залю раніцай 19 лютага запусьцілі каля 30 чалавек (яна магла зьмясьціць каля 50. — РС) — удзельнікаў працэсу, родных абвінавачаных, некалькіх іхных калег, а таксама прадстаўнікоў дзяржаўных СМІ. Звонку засталося каля ста чалавек. Ня ўсіх, хто хацеў прысутнічаць у залі суду, пусьцілі нават у фае. Барысевіч і Сарокіна прывезьлі ў Дом правасудзьдзя ў кайданках, канвой завёў іх праз асобныя дзьверы.
Судзьдзя Бандарэнка пастанавіла зрабіць працэс закрытым ужо праз паўгадзіны пасьля яго пачатку. Прычынай стала ўсё тая ж мэдычная тайна пра стан Рамана Бандарэнкі неўзабаве пасьля інцыдэнту на «плошчы Перамен», якую, па вэрсіі абвінавачваньня, абнародавалі Арцём Сарокін і Кацярына Барысевіч. У залі засталіся толькі адвакаты, абвінавачаныя і судзьдзя з пракурорам і сакратаркай.
