Украіна пачала новае расьсьледаваньне супраць беларускай прадукцыі. Падазраюць у дэмпінгу

Расьсьледаваньне пачалі на падставе скаргі ўкраінскага вытворцы аналягічнай прадукцыі — кампаніі «Свиспан Лімітед». Камісія ўстанавіла, што ў скарзе зьмешчаныя дастаткова абгрунтаваныя доказы паставак ва Ўкраіну прадукцыі па дэмпінгавых цэнах і ў дэмпінгавых аб’ёмах, якія могуць нанесьці шкоду нацыянальнаму вытворцу.

Міністэрства разьвіцьця эканомікі, гандлю і сельскай гаспадаркі Ўкраіны абвясьціла, што цягам 30 дзён праводзіць рэгістрацыю зацікаўленых бакоў, якія цягам двух месяцаў мусяць накіраваць пісьмовыя камэнтары і інфармацыю з нагоды прадмета расьсьледаваньня.

ГЛЯДЗІЦЕ ТАКСАМА:

Беларускі бізнэсовец захаваў кантроль над нафтаправодам ва Ўкраіне, але спыніў транзыт нафты

Згодна з заканадаўствам Украіны тэрмін правядзеньня антыдэмпінгавага расьсьледаваньня не павінен перавышаць 270 дзён, а пры надзвычайных абставінах ён можа быць падоўжаны да 330 дзён.

Якая прадукцыя зь Беларусі знаходзіцца ў цэнтры расьсьледаваньняў

• У чэрвені 2020 Міністэрства разьвіцьця эканомікі, гандлю і сельскай гаспадаркі Ўкраіны ў інтарэсах пяці нацыянальных вытворцаў пачало антыдэмпінгавае расьсьледаваньне аб пастаўках фанэры зь Беларусі.

• У лістападзе 2020 году Ўкраіна пачала антыдэмпінгавае расьсьледаваньне паставак цеплаізаляцыйных матэрыялаў зь Беларусі і Расеі, якія ў замежнаэканамічнай дзейнасьці кваліфікуюцца кодам ех 6806 10 00 00: шклавата, мінэральная сылікатная вата і аналягічныя віды мінэральнай ваты, за выключэньнем іх сумесяў.

Што ўжо знаходзіцца пад украінскім антыдэмпінгам

• З 26 сакавіка 2020 году набыло моц рашэньне Ўкраіны аб увядзеньні антыдэмпінгавага мыта на пастаўкі зь Беларусі будаўнічых блёкаў зь цеплаізаляцыйнага бэтону памерам 34,19% ад мытнай вартасьці прадукцыі.

• У траўні 2020 году Ўкраіна абмежавала пастаўкі беларускіх запалак на ўкраінскі рынак антыдэмпінгавым мытам памерам 21,32%.
• 1 лютага 2019 году міжведамасная камісія міжнароднага гандлю канчаткова ўвяла абмежаваньні на пастаўкі прадукцыі Берасьцейскага электралямпавага заводу на пяць гадоў (да 2 сакавіка 2023 году).
• У траўні 2019 году Ўкраіна на пяць гадоў абмежавала пастаўкі зь Беларусі цэмэнтных клінкераў і портляндцэмэнту мытам у памеры 57,03%.

• Кампрамісным стала рашэньне міжведамаснай камісіі наконт паставак ва Ўкраіну прадукцыі «Мазырсолі» — кампанія ня будзе выплачваць антыдэмпінгавага збору, але мусіць прытрымлівацца пэўных цэнавых абавязаньняў.

• З 1 верасьня 2018 году на тры гады Ўкраіна ў «інтарэсах нацыянальных вытворцаў» абмежавала пастаўкі сернай кіслаты і олеўму, якія традыцыйна набываліся на трох найбуйнейшых хімічных прадпрыемствах Беларусі — Гомельскім хімічным заводзе, наваполацкім «Нафтане» і «ГроднаАзоце». Сёлета абмежаваньні могуць перагледзець. https://www.svaboda.org/a/29468439.html