Праз чатыры дні пасьля рэкордаў холаду ў Беларусі абнавіліся 11 рэкордаў цяпла, пры гэтым зафіксаваны новы тэмпэратурны максымум для 23 студзеня за ўвесь пэрыяд інструмэнтальных мэтэаназіраньняў, сьведчыць праведзены БелаПАН параўнальны аналіз апэратыўных і архіўных дадзеных Белгідрамэту.
Цяплей за ўсё было ў Жыткавічах і Лельчыцах Гомельскай вобласьці — 10,4 градуса вышэй за нуль. Ранейшы рэкорд дня складаў 8,9 градуса (23 студзеня 1993 году ў Высокім Берасьцейскай вобласьці). У Жыткавічах разам з гэтым упаў рэкорд 1959, у Лельчыцах — 1993 году, розьніца склала амаль 3 градусы.
У Мар’інай Горцы перавышаны тэмпэратурны максымум дня, зафіксаваны 122 гады таму. 23 студзеня 1899 году тут было 6,5 градусаў цяпла, учора тэрмомэтар паказаў +7,8 градуса.
Абнавіўся экстрэмум у Берасьці — 9,4 (папярэдні рэкорд — 8,7 у 1959 годзе). Адразу ў шасьці гарадах пабітыя рэкорды 1993 году: у Ганцавічах — цяпер 8,3 (тады 7,6), Пінску — 8,2 (8), Слуцку — 7,1 (5,7), Беразіне — 6,3 (5,8), Наваградку — 6 (5,6) , Валожыне — 5,3 (5,1).
Пэрыяд цеплыні надзвычай хутка замяніў нізкія тэмпэратуры. Яшчэ 16-19 студзеня на мэтэастанцыях абнавіліся 27 начных мінімумаў.
У бліжэйшыя дні, паводле сыноптыкаў, адліга захаваецца.
