У мікрараёнах Паўднёвы Захад і Малінаўка некалькі дамоў засталіся без гарачай вады і цяпла. Пра гэта парталу TUT.BY паведамілі чытачы.
Менчукі паведамілі, што гарачая вада і ацяпленьне зьніклі ў доме 22/1 па вуліцы Голубева, па вуліцы Касманаўтаў, з 4-га па 18-ы дом, у дамах па вуліцы Бялецкага і праспэкце Любімава, на вуліцы Ясеніна 58, 60, 62, 64, а таксама ў дамах на Гурскага, Алібегава.
«У 115 не датэлефанавацца, 120 чалавек у чарзе. У ЖЭСе трубку не здымаюць», — піша чытач. Людзі кажуць, што ў кватэрах становіцца адчувальна холадна.
Раней чытачы паведамлялі пра «раку кіпеню» на вуліцы Ясеніна — прарвала трубу.
Тэлеграм канал «МотолькоПомоги» піша, што гарачай вады і цяпла няма і ў Міхалове — на вуліцы Брыля, Астроскіх, а таксама ў дамах па вуліцы Слабадзкой і Рафіева.
«Добры вечар. Менск, вуліца Громава няма ацяпленьня і гарачай вады», — піша яшчэ адзін чытач. Паводле яго, аварыйныя службы кажуць, што на ліквідацыю аварыі пойдзе да сутак.
У бацькоўскім чаце 10-й гімназіі (Голубева, 29) папярэдзілі, што з прычыны надзвычайнага здарэньня з прарывам трубы заўтра заняткаў ня будзе — іх пераносяць на суботу.
Тэлеграм-канал «Отчислено» піша, што ў 2-м інтэрнаце БДУІР па вуліцы Л. Бяды прарвала трубы на 4-м паверсе.
Жыхары дома па праспэкце Газеты «Звязда» паведамляюць, што батарэі пакуль цёплыя, але няма гарачай вады.
