Аўтарынак у Малінаўцы выставілі на продаж

Найбуйнейшы аўтамабільны рынак Беларусі і будаўнічы рынак пры ім выставілі на продаж, піша belretail.by.

Пачатковая цана аўтамабільнага рынку — амаль 44 мільёны рублёў, будаўнічага — амаль 2 мільёны.

Таргі пройдуць 15 лютага. Гэта частка працэдуры ліквідацыі ЗАТ «Гандлёвы сьвет „Кальцо“». Яго прызналі банкрутам вясной 2018 году.

«Гандлёвы сьвет „Кальцо“» быў адным з асноўных актываў бізнэсоўца Юрыя Авярʼянава.

Сярод іншых камэрцыйных праектаў Авярʼянава былі:

• рэчавы рынак на стадыёне «Дынама»,
• аўтамабільны рынак у Малінаўцы,
• будаўнічы рынак ва Ўруччы,
• забаўляльныя ўстановы «Бліндаж»,
• «Афрыка»,
• U2,
• першы ў Беларусі боўлінг-клюб Madisson Club,
• парк атракцыёнаў «Дрымлэнд» з аквапаркам.

У 2016 годзе Юры Авярʼянаў заявіў пра рэйдэрскі захоп ягонага бізнэсу і зьехаў у Нямеччыну. Ягоную дачку Вікторыю Авярʼянаву летась адправілі на 2 гады ў калёнію за нясплату падаткаў.

ГЛЯДЗІЦЕ ТАКСАМА:

Дачку бізнэсоўца-ўцекача Авяр’янава асудзілі на тры гады калёніі мінус год па амністыі

Юрыя Авярʼянава таксама абвінавачваюць у нясплаце падаткаў і абʼявілі ў міжнародны вышук. У 2018 годзе яго затрымалі ў Нямеччыне, але адпусьцілі пад абавязаньне яўкі.

Будаўнічы рынак ва Ўруччы ўжо спрабавалі прадаць, але бяз выніку.

«Дрымлэнд» купіць кампанія «Трастхоўп», якая належыць кіраўнікам «А-100».

ГЛЯДЗІЦЕ ТАКСАМА:

Як беларусы губляюць бізнэс. Гісторыя бізнэсоўца Юрыя Авяр’янава, выдачы якога зь Нямеччыны дамагаецца Беларусь