Камандаваньне ўзброеных сілаў Злучаных Штатаў Амэрыкі ў Эўропе бязвыплатна перадало беларускаму войску аналізатар газавага складу крыві. Аналізатар будзе працаваць у Галоўным вайсковым клінічным мэдычным цэнтры Ўзброеных Сілаў Рэспублікі Беларусь, паведаміла Міністэрства абароны.
Гэты аналізатар дазваляе апэратыўна прымаць рашэньні наконт тактыкі лячэньня. Асабліва важны ён для дыягностыкі і выбару тактыкі лячэньня пацыентаў у сярэднецяжкім і цяжкім стане.
«Гэтае ахвяраваньне, як і перададзеныя раней рэсьпіратары N95 і ахоўныя акуляры, падкрэсьлівае прыхільнасьць амэрыканскага народу справе дапамогі ў пабудове лепшай будучыні для Беларусі і яе народу», — адзначаецца ў паведамленьні пасольства.
Міністэрства абароны Беларусі выказала ўдзячнасьць камандаваньню ўзброеных сілаў ЗША ў Эўропе і Пасольству ЗША за дапамогу.
