У кастрычніку 2020 году ГУБАЗіК арганізаваў сачэньне за знаёмай Міколы Дзядка, зь якой той пэрыядычна сустракаўся. Як гаворыцца ў паведамленьні ініцыятывы BYPOL, супрацоўнікі МУС арганізавалі назіраньне і забралі відэазапісы з камэраў Менскага мэтрапалітэну.
Дзеля гэтага, паводле зьвестак BYPOL, выкарыстоўвалася праграма KiPod, распрацаваная кампаніяй «Сінэзіс», якая нядаўна трапіла ў санкцыйныя сьпісы Эўразьвязу.
У выніку сілавікам стала вядома, што Мікола Дзядок пражываў у пасёлку Сасновы Асіповіцкага раёну, адкуль на маршрутным таксі выяжджаў у Менск, карыстаючыся далей станцыяй мэтро «Магілёўская».
Пасьля затрыманьня Мікола Дзядок заявіў пра катаваньні, непасрэднымі выканаўцамі якіх былі супрацоўнікі СОБР, а кіраўнікамі — афіцэры з ГУБАЗіКу.
Бацька Мікалая Дзядка патрабуе завядзеньня крымінальнай справы па факце зьбіцьця сына
Аляксандар Дзядок патрабуе прыцягненьня да адказнасьці ўсіх, хто «рабіў незаконнае затрыманьне Мікалая, б'ючы яго і ўжываючы да яго катаваньні, як у кватэры, так і ў будынку ГУБАЗіКу, прымушаючы яго гаварыць на камэру прыніжальныя паказаньні пад сьцягам».
Пасьля затрыманьня Мікалая Дзядка 12 лістапада МУС паведамляла, што ён «публічна заклікаў да ўдзелу ў масавых беспарадках. Прэс-служба ведамства апублікавала відэа, на якім Мікалай Дзядок выглядае моцна пабітым.
Паводле бацькі Мікалая, увечары 12 лістапада да яго ў кватэру ўварваліся сем супрацоўнікаў ГУБАЗіК, пасьля чаго пачалі біць, пагражаць і катаваць Міколу:
«Нягледзячы на тое, што ён быў адзін у кватэры, не аказваў ім ніякага супраціву, быў бяззбройны і зусім не агрэсіўны, яго сталі біць, патрабуючы нейкіх прызнаньняў і пароляў да кампутара і Telegram.
Да яго ўжываліся катаваньні з мэтай прыгняценьня яго волі, у тым ліку пагрозы больш жорсткага фізычнага гвалту. Да яго былі ўжытыя катаваньні газам, распыленым у твар, пры гэтым яго рукі былі скаваныя ззаду.
Усё гэта мне вядома з апублікаванага МУС відэа, з апавяданьняў Мікалая адвакату і з хадайніцтва адваката сьледчаму. Адвакатка бачыла на целе і на твары Мікалая множныя пашкоджаньні, атрыманыя падчас зьбіваньня ў кватэры і ў будынку ГУБАЗіКу ў Менску. Таксама супрацоўнікі ведамства пагражалі Мікалаю далейшым гвалтам, калі ён будзе расказваць аб злачынных дзеяньнях бандытаў з ГУБАЗіКу».
24 лістапада праваабаронцы прызналі Мікалая Дзядка палітвязьнем.
