Без вады застаюцца каля 10 тысяч чалавек, ацяпленьне таксама адключаюць — нібыта з прычыны аварыі.
«Менскводаканал» пачаў прафіляктычныя работы ў менскім мікрараёне Новая Баравая перад запускам адноўленай сыстэмы водазабесьпячэньня, паведаміла агенцтва БелТА са спасылкай на прадстаўнікоў прадпрыемства.
«Аднаўленчыя работы на сетках водазабесьпячэньня выкананыя. У адпаведнасьці з рэглямэнтамі «Менскводаканал» прыступіў да прафіляктычных работ перад запускам сыстэмы водазабесьпячэньня Новай Баравой», — сказалі на прадпрыемстве.
Там дадалі, што ў поўным аб'ёме водазабесьпячэньне адновяць пасьля атрыманьня станоўчых вынікаў лябараторнай праверкі якасьці вады. Канкрэтных тэрмінаў не называюць.
У раёне Новая Баравая з раніцы 15 лістапада няма халоднага і гарачага водазабесьпячэньня.
«Менскводаканал» лічыць, што праблемы з вадой у Новай Баравой могуць быць ад наўмыснага пашкоджаньня сыстэмы водазабесьпячэньня.
«З мэтай максымальна хуткага выяўленьня прычын аварыі прадпрыемствам праведзена абсьледаваньне сетак. Выяўлены няспраўнасьці запорнай арматуры, у тым ліку разглядаецца варыянт наўмыснага пашкоджаньня», — гаварылася ў паведамленьні «Менскводаканалу» ў панядзелак.
Для жыхароў мікрараёну валянтэры арганізавалі падвоз пітной вады.
Паводле карэспандэнта Свабоды, цэнтралізаванай вады ў Новай Баравой па-ранейшаму няма, людзі стаяць у чарзе ля цыстэрнаў.
Спэцыялісты «Менскводаканалу» кажуць, што прычыну дагэтуль не знайшлі, цяпер прамываюць сыстэму.
У Новую Баравую вярнулі ацяпленьне
Кампанія «А-100 Камфорт», якая абслугоўвае раён, паведаміла пра вяртаньне ацяпленьня. Аб вяртаньні вады, піша кампанія, «вядуцца перамовы з прадстаўнікамі дзяржаўных органаў».
Лукашэнка тым часам даручыў кантраляваць сытуацыю з вадой былому начальніку менскай міліцыі Барсукову і старшыні Савету Рэспублікі Качанавай.
БХК: «Гэта парушэньне фундамэнтальнага права чалавека»
Жыхары мікрараёну выказваюць здагадкі, што адключэньне вады і ацяпленьня — вынік іхняй палітычнай актыўнасьці.
У сувязі з гэтым Беларускі Хэльсынскі камітэт рыхтуе зварот спэцдакладчыку ААН аб праве на ваду. Згодна зь міжнародным стандартам, доступ да чыстай пітной вады і санітарных паслуг — найважнейшая ўмова жыцьця і неад'емнае права чалавека.
Пра гэта Свабодзе паведаміў старшыня Беларускага Хэльсынскага камітэту Алег Гулак, абураны адключэньнем вады ў Новай Баравой.
«Гэта парушэньне фундамэнтальнага права чалавека, і гэта адбываецца ў адказ на пазыцыю людзей, якія там жывуць, з мэтай прымусіць іх адмовіцца ад сваіх выказваньняў, свабоды слова. Гэта незаконныя мэтады. Гэта ўжо новае слова ў рэпрэсіях, улады выкарыстоўваюць для ціску сацыяльна-бытавыя ўмовы, што ставіць пад пагрозу і здароўе людзей, і санітарна-эпідэмічную сытуацыю. Людзей пазбаўляюць умоваў для нармальнага жыцьця, доступу да чыстай вады. Гэта злоўжываньне, і дзяржава ня робіць захадаў, каб гэта спыніць», — заявіў Алег Гулак.
Мяцежная Новая Баравая
Мікрараён Новая Баравая пад Менскам праславіўся сваёй палітычнай актыўнасьцю яшчэ падчас перадвыбарчай кампаніі. Тамтэйшыя жыхары праводзілі флэшмобы ў падтрымку альтэрнатыўных кандыдатаў у прэзыдэнты, масава запісваліся ў сябры выбарчых камісій і ў назіральнікі, ладзілі ўласныя ланцугі салідарнасьці і шэсьці са сьцягамі.
Затрыманьні АМАПам, дадатковыя патрулі міліцыі і барацьба ўладаў з масавым вывешваньнем бел-чырвона-белых сьцягоў сталі часткай штодзённага жыцьця мікрараёну.
