Некалькі дзясяткаў чалавек традыцыйна сабраліся а 14-й гадзіне каля Чырвонага касьцёла і рушылі на праспэкт Незалежнасьці. Правесьці марш ім перашкаджалі сілавікі.
На рагу гатэля «Менск», побач з касьцёлам, стаялі чатыры мікрааўтобусы. Адтуль насустрач удзельнікам маршу выйшлі сілавікі ў чорным. Людзі разьвярнуліся і ідуць назад на плошчу. Сілавікі рушылі за імі.
Удзельнікі маршу выстройваюцца ў ланцуг на плошчы ўздоўж праспэкту. Супрацоўнікі міліцыі ў форме папярэдзілі іх праз мэгафон аб адказнасьці за ўдзел у несанкцыянаваным мерапрыемстве і папрасілі разысьціся. Пратэстоўцы павольна рухаюцца ўздоўж праезнай часткі, іх суправаджаюць мікрааўтобусы зь сілавікамі.
Марш плянавалі правесьці пад лёзунгам «Людзі з інваліднасьцю супраць „бязьмежжа“» ў знак салідарнасьці з тымі, каго затрымалі з палітычных матываў.
«Мы ёсьць! І ў нас ёсьць грамадзянская пазыцыя і права яе выказваць. Мы будзем гуляць да поўнай перамогі! Мы будзем гуляць за ўсіх, хто затрыманы! Мы будзем гуляць за ўсіх, хто баіцца», — сьцьвярджалася ў анонсе маршу.
Папярэдні марш адбыўся 5 лістапада. Тады падчас акцыі затрымалі некалькі чалавек, у тым ліку журналістку Анастасію Захарэвіч. Яе арыштавалі на 15 сутак за ўдзел у несанкцыянаваным мерапрыемстве і за непадпарадкаваньне міліцыі.
