Apple не патрабавала ад Telegram выдаліць каналы, у якіх публікуюцца асабістыя зьвесткі беларускіх міліцыянтаў. Пра гэта прадстаўнікі кампаніі расказалі выданьню TJournal.
У Apple пацьвердзілі, што патрабавалі выдаліць толькі канкрэтныя допісы, якія раскрываюць асабістыя зьвесткі бяз згоды чалавека, бо гэта забаронена правіламі AppStore.
Падчас абмеркаваньня каманда Telegram не выстаўляла пярэчаньняў і сама заявіла, што праверыць інфармацыі і дасьць справаздачу пасьля завяршэньня расьсьледаваньня, растлумачылі ў Apple.
Павел Дураў 8 кастрычніка заявіў, што Apple запатрабавала заблякаваць тры каналы, якія спэцыялізуюцца на дэананімізацыі супрацоўнікаў сілавых органаў Беларусі, якія ўдзельнічаюць у разгонах мірных акцыяў пратэсту.
«Я мяркую, што, на жаль, гэтыя каналы будуць у выніку заблякаваныя на iOS, але застануцца даступнымі на іншых плятформах», — напісаў Дураў.
Павел Дураў апошнія некалькі месяцаў канфліктуе з Apple з прычыны збору ў 30% для распрацоўнікаў у AppStore. У канцы ліпеня мэсэнджар падаў скаргу на камісію крамы ў рэгуляцыйныя органы Эўразьвязу.
