Праваабаронцы сабралі прозьвішчы больш як 30 затрыманых у Менску і рэгіёнах. Сьпіс «Вясны»
Праваабаронцам «Вясны» вядома сама менш пра два дзясяткі затрыманых падчас Маршу справядлівасьці ў розных месцах Беларусі. Сьпіс дапаўняецца.
Акцыі пратэсту праходзяць у шэрагу гарадоў краіны — Менску, Берасьці, Горадні, Гомлі, Магілёве. Усюды тут адбыліся кропкавыя затрыманьні дэманстрантаў. Вядома, што сярод дастаўленых у пастарункі — вядомы горадзенскі гісторык, доктар навук Алесь Смалянчук, магілёўскія журналісты Аліна Скрабунова і Аляксандар Сідарэўскі, а таксама Алег Маісееў, давераная асоба кандыдаткі ў прэзыдэнты Сьвятланы Ціханоўскай.
Таксама ў Горадні зь невядомых прычын быў спынены аўтамабіль, экіпаваныя сілавікі выбілі шкло, выцягнулі і брутальна затрымалі кіроўцу. Машына так і засталася з адчыненымі дзьвярыма на дарозе.
Менск: пратэстоўцы падыходзяць да Траецкага прадмесьця
Галава калёны прайшла мост празь Сьвіслач. Падыходзіць да Траецкага прадмесьця па вуліцы Багдановіча.
Менск: праспэкт Незалежнасьці пусты
Тым часам праспэкт Незалежнасьці ў Менску пустуе, толькі сілавікі стаяць у шэрагу.
А да вуліцы Валадарскага падагналі вадамёты.
Менск: ля Палаца Незалежнасьці затрымалі журналіста
У раёне Палаца Незалежнасьці ў Менску затрыманы журналіст Дзяніс Боршч, паведамляе Беларуская асацыяцыя журналістаў.
Берасьце: у міліцыю паляцелі бутэлькі, пачаліся жорсткія затрыманьні
У Берасьці ў міліцыю паляцелі бутэлькі. Міліцыя са стрэльбамі. Пачаліся жорсткія затрыманьні, натоўп спрабуе бараніць людзей. Міліцыя зрабіла папераджальны стрэл у паветра, паведамляе мясцовае выданьне «Бінокль».
Адбываюцца жорсткія сутычкі пратэстоўцаў з амапаўцамі.
Менск: у калёне пратэстоўцаў былы кандыдат у прэзыдэнты Ўладзімер Някляеў
Калёна пратэстоўцаў павярнула на вуліцу Куйбышава. Выхад на праспэкт перагароджаны сілавікамі і вадамётамі.
Былы кандыдат у прэзыдэнты Ўладзімер Някляеў таксама ідзе ў Маршы Справядлівасьці. Ён кажа, што ганарыцца беларусамі. «Глядзеў БТ, і там кажуць, што хваля пратэстаў выдыхаецца, але мы бачым, што гэта ня так. Людзі не пагаджаюцца з хлусьнёй. Калі ўлада не прыслухаецца да закліку «Сыходзь», то па законе хвалі яе проста накрые гэтым пратэстам».
У менскім Маршы ўдзельнічаюць спартоўцы
У менскім «Маршы справядлівасьці» ідзе таксама калёна спартоўцаў.
Менск: пратэстоўцы рухаюцца па Багдановіча
Калёна падышла да комплексу будынкаў заводу «Гарызонт», людзі рухаюцца далей па вуліцы Багдановіча.
Менск: пратэстоўцы ідуць у бок плошчы Якуба Коласа
Галава «Маршу справядлівасьці» дайшла да Камароўскага рынку. Асноўная частка людзей павярнула на вуліцу Веры Харужай і рушыла ў бок плошчы Якуба Коласа.
Празь некалькі хвілін першыя ўдзельнікі маршу выйшлі на плошчу Якуба Коласа.
Горадня: людзі зноў сабраліся ля кінатэатру «Кастрычнік»
Некалькі дзясяткаў чалавек у Горадні сабраліся наноў каля кінатэатра «Кастрычнік». Прыехалі міліцэйскія аўтобусы. Затрымалі непаўналетняга хлопца.
Менск: калёна пратэстоўцаў перакрыла рух на праспэкце Незалежнасьці
«Марш салідарнасьці» перакрыў праспэкт Незалежнасьці ў раёне плошчы Якуба Коласа. Людзі працягваюць рух па вуліцы Веры Харужай. Плошча Якуба Коласа цалкам запоўненая ўдзельнікамі Маршу.
Менск: марш рушыць праспэктам Незалежнасьці, каля Опэрнага тэатру — затрыманьні
«Марш справядлівасьці» ў Менску рушыць праспэктам Незалежнасьці ў бок плошчы Перамогі.
Там часам у сквэры каля Опэрнага тэатру АМАП кінуўся на дэманстрантаў, паведамляе «Наша Ніва». Мікрааўтобусы сілавікоў прыпаркаваныя на вуліцах Купалы і Багдановіча. Тактыка сілавікоў аналягічная той, што выкарыстоўвалася тыдзень таму. Сілавікі «зачышчаюць хвасты» калёны.
Менск: дарогу пратэстоўцам перакрылі сілавікі са спэцтэхнікай
Людзі падышлі да блёку сілавікоў, выстаўленага за скрыжаваньнем праспэкту Незалежнасьці і вуліцы Казлова, бліжэй да плошчы Перамогі. Праспэкт перакрыты сыстэмай «Рубеж», іншай спэцтэхнікай, некалькімі шэрагамі сілавікоў.
На плошчы Перамогі затрымалі раварыста.
Менск: Сілавікі пачалі расьсякаць калёну, людзі ўцякаюць
Людзі ўпрытык падыходзяць да блёку сілавікоў, адлегласьць паміж імі 5–10 мэтраў. Крычаць «Пошел вон, ты и твой ОМОН». Сілавікі ўключаюць сырэны на спэцтэхніцы. Скрыжаваньне Незалежнасьці-Казлова напаўняецца пратэстоўцамі.
«Марш cалідарнасьці» павяртае з праспэкта Незалежнасьці на вуліцу Казлова.
Сілавікі пачалі расьсякаць калёну, высунуўшы сыстэму «Рубеж». Людзі ўцякаюць у розныя бакі. Выхады ў двары таксама заблякаваныя.
Хвост калёны тым часам яшчэ выходзіць зь Веры Харужай на плошчу Якуба Коласа. Каб зразумець маштаб маршу ў Менску: шчыльная калёна дэманстрантаў амаль несупынна выходзіла з вуліцы Веры Харужай на плошчу Якуба Коласа цягам 40 хвілін.
У Горадні затрымалі гісторыка Алеся Смаленчука
У Горадні быў затрыманы доктар гістарычных навук Алесь Смалянчук. Пра гэта паведамілі на старонцы ў фэйсбуку Беларускага архіву вуснай гісторыі. Пазьней стала вядома, што Смаленчука выпусьцілі да суду па адміністрацыйнай справе.
Менск: сілавікі білі ў шчыты, выцясьняючы людзей
Частка Маршу, якая павярнула на вуліцу Казлова, адрэзаная ад асноўнай калёны, што на праспэкце Незалежнасьці. Сілавікі білі ў шчыты, выцясьняючы людзей. Частка пайшла па праспэкце Незалежнасьці назад у бок Якуба Коласа.
Калёна згуртавалася і зноў рушыць у бок блёку сілавікоў і сыстэмы «Рубеж». У першым шэрагу плякат «Народ – чэмпіён». Крычаць «Верым, можам, пераможам».
Менск: на скрыжаваньні Казлова-Незалежнасьці да тысячы сілавікоў
Калёна спынілася за 30-40 мэтраў да сілавікоў. Крычаць «Трыбунал», «Ганьба». Колькасьць сілавікоў значна павялічылася. Наш карэспандэнт кажа, што ў блёку на скрыжаваньні Казлова-Незалежнасьці можа знаходзіцца да тысячы сілавікоў.
Калёна арганізавана разьвярнулася і ідзе назад па праспэкце ў бок плошчы Якуба Коласа.
Менск: на праспэкце Незалежнасьці пачаліся затрыманьні
На праспэкце Незалежнасьці пачаліся затрыманьні каля гімназіі № 23. Пад'ехалі міліцэйскія мікрааўтобусы.
Марш падзяліўся на розныя калёны. Людзі стараюцца сыходзіць вялікімі групамі.
Менск: затрыманьні на вуліцы Зьмітрака Бядулі