Прэзыдэнт Расеі Ўладзімір Пуцін 19 верасьня заявіў, што ўпершыню ў найноўшай гісторыі Расея валодае самай дасканалай зброяй, здольнай абараніць краіну ад якіх-кольвек замахаў звонку.
«На працягу дзесяцігодзьдзяў нам пастаянна даводзілася быць у ролі даганятых; гэта тычылася атамнай, ядзернай зброі, затым далёкай стратэгічнай авіяцыі, а потым і ракетнай міжкантынэнтальнай тэхнікі, гэта значыць таго, што спэцыялісты называюць сродкамі дастаўкі», — цытуе Пуціна агенцтва ТАСС. — Вось цяпер, упершыню ў нашай найноўшай гісторыі, Расея валодае самымі сучаснымі відамі зброі, якія шматкроць перавышаюць паводле сілы, моцы, хуткасьці, дакладнасьці ўсе (віды ўзбраеньня. — РС), якія існавалі і існуюць сёньня, такой зброі няма ні ў кога ў сьвеце, ва ўсякім разе пакуль няма».
У Дзень збройніка Пуцін павіншаваў распрацоўнікаў і вытворцаў лязэрнага комплексу «Пересвет», авіяцыйнай гіпэргукавай ракеты «Кинжал», марскога падводнага рабатызаванага комплексу зь
ядзерным рухавіком «Посейдон», крылатай ракеты неабмежаванай далёкасьці «Буревестник», гіпэргукавой ракеты марскога базаваньня «Циркон» і іншых відаў, якія ўжо паступаюць або неўзабаве паступяць на ўзбраеньне ў армію і флёт, паведамляе «Интерфакс».
Асобна прэзыдэнт Расеі вылучыў ракетную сыстэму «Авангард»:
«У гэтым шэрагу ў сыстэмы ”Авангард” з манэўравым гіпэргукавым блёкам, які рухаецца з хуткасьцю ў 27 разоў большай за хуткасьць гуку і зьмяняе кірунак у вышыні і ў гарызанталі, — асаблівае месца. «Авангард» — гэта ня проста новая сыстэма, гэта новы від стратэгічнай зброі», — сказаў ён.
У сьнежні летась у Міністэрстве абароны Расеі паведамілі, што на баявое дзяжурства пастаўлены першы ракетны полк, узброены стратэгічным комплексам з гіпэргукавым баявым блёкам «Авангард». Раней міністэрства паведамляла аб падрыхтоўцы да разгортваньня першага палку з «Авангардам» пад Арэнбургам.
Тым часам прэзыдэнт ЗША Дональд Трамп на сустрэчы з прыхільнікамі ў штаце Мінэсота заявіў, што Расея стварыла сваю гіпэргукавую зброю на падставе зьвестак, скрадзеных у адміністрацыі экс-прэзыдэнта Злучаных Штатаў Барака Абамы.
«У іх ёсьць ракета, супэр-пупэр-гіпэргукавая. Я называю яе супэр-пупэр, бо яна ў пяць разоў хутчэйшая, чым звычайная ракета», — сказаў Трамп. Аднак, паводле прэзыдэнта, ЗША маюць ракету, якая разьвівае нашмат большую хуткасьць. Гэтай зброі зайздросьцяць амэрыканцам Расея і Кітай, падкрэсьліў Трамп.
Аб распрацоўцы амэрыканскай ракеты, якая будзе ў 17 разоў хутчэйшая за ракеты іншых краін, Трамп паведаміў у траўні. Пэнтагон пацьвердзіў інфармацыю Трампа. Журналісты CNN тады адзначылі, што зброя ЗША ўсё яшчэ саступае расейскім і кітайскім распрацоўкам. Паводле зьвестак СМІ, на ўзбраеньне новая ракета Злучаных Штатаў паступіць не раней за 2023 год.
