У Смалявічах перад будынкам міліцыі чалавек абліў сябе бэнзінам і падпаліў.
Жыхар Смалявічаў пацьвердзіў Свабодзе інфармацыю пра спробу самаспаленьня невядомага на прыступках мясцовага РАУС.
«Я размаўляў са сьведкамі здарэньня, яны самі гэта бачылі, мужчына абліў сябе бэнзінам і падпаліў. Гэта адбылося а палове першай. Гэта малады хлопец, хацеў даказаць сваю праўду; ці жывы, невядома. Але пра гэты выпадак ужо ведаюць усе Смалявічы».
Відавочца паведаміў журналісту Tut.by , што ён бачыў:
«Я пад'яжджаў да скрыжаваньня, побач зь якім знаходзіцца РАУС. Там стаялі пажарныя машыны з маячкамі, ля ганку знаходзіліся супрацоўнікі міліцыі. Каля іх ляжаў чалавек, побач гарэла нейкая ануча або адзеньне. Спачатку падумаў, то гэта лялька нейкая ляжыць, але потым заўважыў, што чалавек варушыцца. Ён быў увесь у белым парашку. Потым прымчаліся дзьве машыны хуткай дапамогі і мужчыну павезьлі».
Сьведкі кажуць, што мужчына, перад тым як сябе падпаліць, не крычаў якіх-небудзь лёзунгаў, проста падпаліў сябе. Супрацоўнік РАУС патушыў яго з вогнетушыцеля.
Цяпер мужчына ў рэанімацыі Смалявіцкай раённай лякарні, яго асоба высвятляецца. Пакуль невядомыя прычыны, якая падштурхнулі яго на такі крок.
Месца здарэньня ачэпленае, працуюць супрацоўнікі Сьледчага камітэту. Тут ляжаць рэшткі адзеньня і абутак мужчыны.
У Смалявіцкім РАУС адмовіліся Свабодзе пацьвердзіць або абвергнуць гэтыя зьвесткі, накіраваўшы ў прэс-службу МУС.
Прэсавая сакратарка МУС Вольга Чамаданава таксама адмовілася нешта сказаць, заявіўшы Свабодзе, што «інфармацыя зьявіцца ў тэлеграм-канале», калі ў ведамстве палічаць гэта патрэбным.
Тэлеграм-канал Nexta апублікаваў відэа інцыдэнту.
