Менск: Частка калёны перайшла на другі бок праспэкту, частка павярнула назад
Калёна спынілася на скрыжаваньні праспэкту Незалежнасьці з вуліцай Дарашэвіча. Жанчынам паведамілі, што ў раёне Акадэміі навук ёсьць сілавікі.
Празь нейкі час жанчыны вырашылі перайсьці на другі бок праспэкту, дзе Маскоўска-Венскі гандлёвы цэнтар. Людзей так шмат, што рух на праспэкце на некалькі хвілін перакрыты. Гэтая частка калёны пачынае рух назад у бок плошчы Якуба Коласа.
Жанчыны прагналі групу журналістаў «Россия сегодня». Абступілі іх і крычалі: «Прыдыбайла, сыходзь!», «Раша тудэй, вали домой!». Адзін з журналістаў спрабаваў давесьці, што ён не Прыдыбайла. Урэшце журналісты перайшлі на другі бок праспэкту.
Галава маршу спынілася каля філярмоніі.
У Менску падчас Жаночага маршу затрымалі раварыста
На скрыжаваньні Машэрава і Незалежнасьці спыніўся жоўты мікрааўтобус, зь яго выскачылі 4 амапаўцы і затрымалі хлопца на ровары, які спыніўся на скрыжаваньні. Закінулі ў бус разам з роварам. Усё гэта адбылося на вачах журналіста Свабоды.
Жаночы марш у Менску. ФОТА, ВІДЭА
Затрыманьні на Жаночым маршы ў Менску. ФОТА
Менск: Марш вярнуўся да плошчы Перамогі. Зноў затрыманьні
Калёна пераходзіць вуліцу Казлова, спускаецца ў падземны пераход. На самой плошчы Перамогі процьма міліцэйскіх бусаў. Вакол гэтых бусаў стаіць вельмі шмат сілавікоў.
На плошчы Перамогі адбыліся затрыманьні жанчын. Іх пасадзілі ў той жа мікрааўтобус, які затрымліваў хлопца на ровары.
Жаночы марш у Менску скончыўся: удзельніцы разыходзяцца
Большая частка калёны спынілася каля крамы «Акіян». Людзі пачалі разыходзіцца, частка спускаецца ў мэтро.
Да «Акіяна» пачынаюць пад'яжджаць мікрааўтобусы. Каля «Акіяна» засталіся журналісты і некалькі дзясяткаў чалавек.
На скрыжаваньні з вуліцай Казлова затрымалі яшчэ аднаго хлопца. Удзельніцы маршу разыходзяцца.
Журналісты паведамляюць, што Марш скончыўся. Людзі амаль разышліся.
У Менску працягваюцца затрыманьні
Каля філярмоніі на плошчы Якуба Коласа ў мікрааўтобус зацягнулі чалавека зь бел-чырвона-белым сьцягам. Жаночы марш ужо скончыўся.
Тым часам каля плошчы Незалежнасьці, дзе нядаўна праходзіла праўладная акцыя пад чырвона-зялёнымі сьцягамі, стаяць аўтазакі.
У палітвязьня Шклярава зламаны палец і высокая тэмпэратура, падазрэньне на каранавірус
У паліттэхноляга Віталя Шклярава, які ўжо паўтара месяца знаходзіцца ў менскім СІЗА, некалькі дзён трымаецца высокая тэмпэратура і кашаль. Як паведаміў адвакат Антон Гашынскі, нягледзячы на тэмпэратуру, вышэйшую за 39 градусаў, 8 верасьня Віталю Шкляраву адмовіліся зрабіць тэст на каранавірус і флюараграфію. Лекара выклікалі толькі тады, калі тэмпэратура дасягнула крытычнай адзнакі, але далі толькі ібупрафэн.
Акрамя таго, у вязьня зламаны палец, але ён адмаўляецца расказаць, як гэта адбылося, і моцна напалоханы, падкрэсьлівае Гашынскі. Ён наведваў СІЗА 11 верасьня, але Шклярава да яго ня вывелі. Тады адвакат зьвярнуўся да начальніка мэдычнай часткі з патрабаваньнем наведаць падабароннага ў камэры і асабіста правесьці агляд.
Віталя Шклярава затрымалі 29 ліпеня ў Менску. 7 жніўня паліттэхнолягу выставілі абвінавачаньне паводле ч. 1 арт. 342 КК «Арганізацыя групавых дзеяньняў, якія груба парушаюць грамадзкі парадак і зьвязаныя зь яўным непадпарадкаваньнем законным патрабаваньням прадстаўнікоў улады».
Роварны прабег салідарнасьці ў Менску
З боку плошчы Перамогі ў бок плошчы Якуба Коласа праехала калёна раварыстаў зь бел-чырвона-белымі сьцягамі. Празь некалькі хвілін — аўтазакі і мікрааўтобусы без нумароў, паведамляе Tut.by.
Лукашэнка сабраў нараду зь сілавікамі
Тым часам Аляксандар Лукашэнка сёньня ўвечары сабраў нараду зь сілавікамі ў Палацы Незалежнасьці, паведаміў блізкі да кіраўніка Беларусі ананімны Тэлеграм-канал «Пул первого».
У Дзень гораду над Гомлем залунаў нацыянальны сьцяг
Ранкам 12 верасьня невядомыя вывесілі бел-чырвона-белы сьцяг на вежы ў цэнтры гораду, у палацава-паркавым ансамлі. Якраз у гэты час на набярэжнай ракі Сож пачынаўся канцэрт, на якім прысутнічала кіраўніцтва гораду. Цяпер сьцяга на вежы няма.
«Нясуць небясьпеку пажару». Чыноўнік Менскага гарвыканкаму патлумачыў, чаму здымаюць бел-чырвона-белыя сьцягі
Падчас прамой тэлефоннай лініі 12 верасьня з намесьнікам старшыні Менгарвыканкаму Арцёмам Цуранам у яго пацікавіліся, ці законна вывешваць чырвоныя і белыя стужкі на аб’ектах гарадзкой інфраструктуры.
«Ініцыятыва грамадзян не павінна быць самавольнай. Праз 2–3 месяцы гэтыя стужачкі ператворацца ў неахайныя шматкі, якія ня будуць несьці эстэтычнага эфэкту. Большасьць людзей падобныя ініцыятывы раздражняюць, калі кожны дзень зьяўляюцца надпісы, стужкі, сьцягі ў неўстаноўленых месцах», — цытуе чыноўніка агенцтва „Мінск-Навіны“.
«Вывешваньне сьцягоў на бальконах, фасадах дамоў стварае пажаранебясьпечную сытуацыю. Палатном завешваюць некалькі паверхаў. Як правіла, гэта штучныя тканіны, лёгкаўзгаральныя. У выпадку ўзгараньня могуць пацярпець людзі», — аргумэнтаваў Арцём Цуран.
Мітрапаліт Веньямін: «Трэба пачаць жыць з новага аркуша. Новая Канстытуцыя, новыя выбары...»
Мітрапаліт Менскі і Заслаўскі Веньямін, Патрыяршы экзарх усяе Беларусі, даў інтэрвію расейскаму тэлеканалу RT. Прыводзім некаторыя выказваньні герарха.
- «Тыя, хто дапусьціў супрацьпраўныя дзеяньні, па-чалавечы павінны панесьці пакараньне. Але трэба ўсьведамляць, што людзей будзе судзіць і Бог».
- «У прымірэньні трэба пераступіць праз крыўду і забыць пра яе. Трэба пачаць жыць з новага аркуша. Па-новаму пачаць пісаць гісторыю радзімы, дзе будзе прапісаная і новая Канстытуцыя, новыя выбары і г. д». Цалкам тут.
«Мы за вас! Мы разам!» Бацькі студэнтаў МДЛУ запісалі відэазварот у падтрымку дзяцей
У відэароліку гучаць словы, што бацькі ня могуць маўчаць, калі іх дзеці не адчуваюць сябе ў бясьпецы, а абарона не зьяўляецца надзейнай. На мінулым тыдні каля будынку Менскага дзяржаўнага лінгвістычнага ўнівэрсытэту студэнты правялі акцыю салідарнасьці. Прыйшлі сілавікі і пачалі затрымліваць студэнтаў. Пазьней людзі ў масках зьявіліся і ў самім будынку ўнівэрсытэту. Цалкам чытайце тут.
Трое сутак арышту за салідарнасьць. Гомельскага выкладчыка пакаралі за пікет у падтрымку салігорскага шахтара
Вадзім Бельскі, выкладчык інфарматыкі Гомельскага дзяржаўнага тэхнічнага ўнівэрсытэту імя Сухога, асуджаны на трое сутак адміністрацыйнага арышту. Як паведамляе карэспандэнт Свабоды, у ІЧУ таксама ўтрымліваецца Яўген Малікаў — выкладчык БелДУТ, гісторык, краязнаўца. Ён прысутнічаў на пікеце і, у сваю чаргу, падтрымаў Вадзіма Бельскага. Пасьля гэтага яго затрымалі і зьмясьцілі да суду ў ізалятар.
11 верасьня кандыдат эканамічных навук Вадзім Бельскі выйшаў да галоўнага корпусу ВНУ на адзіночны пікет. У руках выкладчык трымаў плякат у падтрымку салігорскага шахтара Юрыя Корзуна, які на знак пратэсту супраць беззаконьня ў краіне прыкаваў сябе кайданкамі ў забоі.
Bloomberg: Амэрыканская кампанія прызнала, што перадала Беларусі тэхніку, якая фільтруе інтэрнэт
Агенцтва Bloomberg сьцьвярджае, што мае запіс тэлефоннай канфэрэнцыі амэрыканскай кампаніі Sandvine, дзе кіраўнікі прызналіся ў пастаўках у Беларусь тэхналёгіі, якая фільтруе каля 40% інтэрнэт-трафіка. У канцы жніўня Bloomberg паведамляў, што менавіта дзякуючы абсталяваньню Sandvine 9 жніўня ў Беларусі былі штучна створаныя праблемы з інтэрнэтам.
Падчас згаданай канфэрэнцыі кіраўніцтва запэўніла супрацоўнікаў, што супрацоўніцтва зь Беларусьсю не парушыла санкцыі ЗША. У Sandvine таксама прыйшлі да высновы, што інтэрнэт і доступ да пэўных матэрыялаў на вэб-сайтах «не зьяўляюцца часткай правоў чалавека».
Як вынікае з даступных Bloomberg запісаў, кампанія плянуе захаваць усё ў сакрэце і папярэдзіла аб звальненьнях за распаўсюд гэтай інфармацыі. Дадзенае абсталяваньне, як піша агенцтва, дало магчымасьць Нацыянальнаму цэнтру абмену трафікам унесьці ў чорны сьпіс каля 150 мільёнаў URL-адрасоў вэб-сайтаў.
Мэркель: Наша сэрца б'ецца ў такт з сэрцамі мірных дэманстрантаў у Беларусі
«Мы зь вялікай занепакоенасьцю глядзім на падзеі ў Беларусі», — заявіла канцлерка Нямеччыны Ангела Мэркель у відэазвароце з нагоды Міжнароднага дня дэмакратыі, які адзначаюць 15 верасьня. — Там прыхільнасьць да дэмакратыі літаральна топчуць нагамі».
«Наша сэрца бʼецца ў такт з сэрцамі мірных дэманстрантаў (у Беларусі. — РС). Варта захапленьня тое, зь якой мужнасьцю і рашучасьцю яны выходзяць на вуліцы за свабоду і вяршэнства права», — дадала Мэркель
Падчас Жаночага маршу апэратар RT спрабаваў забраць тэлефон у журналіста Свабоды
«Белсат» паведаміў, што падчас сёньняшняга жаночага маршу ў журналіста Радыё Свабода Алеся Пілецкага «апэратар RT спрабаваў забраць тэлефон». Вось што расказвае сам Алесь:
«Ужо пасьля апошняга затрыманьня, калі ўдзельнікаў акцыі амаль не засталося, на праспэкце заставаліся толькі журналісты. Сярод іх вось гэты незразумелы апэратар з незразумелай карэспандэнткай. Ад іх моцна патыхала алькаголем, гэта заўважылі ўсе. Яны сталі з іншымі журналістамі спрачацца, яшчэ некалькі ўдзельнікаў акцыі заставалася, і зь імі спрачаліся таксама.
Мы падышлі, сталі пытацца, хто яны. Яны ў адказ сталі проста ў твар нас здымаць. Я таксама дастаў тэлефон і стаў спрабаваць здымаць іх. Мужчына агрэсіўна за мой тэлефон ухапіўся, але я ня даў яго забраць. Гэта ўсё вельмі хутка адбывалася. Хто гэтыя журналісты і ці журналісты яны ўвогуле, мы ня ведаем».
Сваякі затрыманых на сёньняшняй акцыі ў Менску чакаюць пад РУУС
Каля Ленінскага РУУС сабраліся сваякі і сябры затрыманых падчас сёньняшняга Маршу салідарнасьці ў Менску. Затрыманым дазволілі перадаць цёплыя рэчы.
Альтэрнатыўнае сьвяткаваньне Дня гораду ў Гомлі
Грамадзкая супольнасьць Гомля ранкам 12 верасьня прыбрала возера ў мікрараёне Мельнікаў Луг, потым зладзіла роварны прабег салідарнасьці і сустрэчу на левым беразе ракі Сож.
Вечаровая акцыя ля бел-чырвона-белага цмока ва Ўруччы
Каля сотні жыхароў Уручча сабраліся ля новага бел-чырвона-белага на вуліцы Русіянава. Атрымаўся стыхійны пікнік з музыкай. Многія прыйшлі зь дзецьмі, хутка тут утварылася імправізаваная выстава дзіцячых малюнкаў. Людзі адпачываюць, частуюць адзін аднаго, размаўляюць.