Пасяджэньне Вярхоўнай Рады Ўкраіны 4 верасьня пачалося з акцыі дэпутатаў у падтрымку грамадзян Беларусі, якія выйшлі на пратэсты супраць фальсыфікацыі выбараў і гвалту над удзельнікамі акцыяў.
У флэшмобе ўдзельнічалі дэпутаты амаль усіх фракцыяў парлямэнту, за выключэньнем «Апазыцыйнай плятформы «За жыцьцё» (яе аснова — партыя на чале з кумам расейскага прэзыдэнта Віктарам Медзьведчуком), дэпутаты якой прынесьлі ў залю афіцыйны дзяржаўны сьцяг Беларусі.
Дэпутаты, якія выйшлі да трыбуны, трымалі бел-чырвона-белыя сьцягі і выгукалі «Жыве Беларусь!». Адзін зь іх, пазафракцыйны дэпутат Ігар Гузь, зьвярнуўся да беларусаў на беларускай мове:
«Шаноўныя спадары! У гэты час барацьбы за вашу свабоду ўкраінцы — з вамі на вуліцах Менску, Берасьця, Горадні і Магілёва. Мы з вамі, браты і сёстры ў Беларусі, у барацьбе за волю, незалежнасьць, свабоду і эўрапейскі выбар беларускага народу. Без свабоднай Беларусі ня будзе вольнай Украіны. Жыве Беларусь!»
Кіраўнік міжфракцыйнага аб’яднаньня «За дэмакратычную Беларусь», дэпутат фракцыі «Эўрапейская салідарнасьць» Аляксей Ганчарэнка перакананы, што беларусы змагаюцца ня толькі за дэмакратыю, а і за існаваньне незалежнай краіны.
«Дыктатар Лукашэнка „зьлівае“ Беларусь Пуціну. Гэтага нельга дапусьціць. Разбурыце турмы муры!». Прадстаўніца фракцыі «Слуга народу» Лізавета Ясько заявіла: «Калі мой сусед, беларускі народ, выходзіць на вуліцу абараняць свабоду, то я перад сваімі вачыма бачу Міхася Жызьнеўскага, беларуса, які загінуў на Майдане, абараняючы ўкраінскую свабоду, я бачу Аляксандра Тарайкоўскага, які загінуў у Менску, абараняючы беларускую свабоду. Свабода, чалавечая годнасьць і правы чалавека ня маюць межаў і палітычнай прыналежнасьці. Таму незалежна ад нашай партыйнай прыналежнасьці мы мусім стаяць разам зь беларускім народам, абараняючы свабоду. Жыве Беларусь!».
Дэпутатка фракцыя «Голас» Саламія Баброўская падтрымала сваіх калег, заявіўшы, што ў Беларусі павінны адбыцца новыя выбары.
Дэпутат фракцыі «Бацькаўшчына» Сяргей Собалеў заявіў:
«Ня можа быць сытуацыі, калі ў цэнтры Эўропы ёсьць краіна, у якой не прызнаныя выбары і застаецца рэжым, які размаўляе з сваімі грамадзянамі шляхам гвалту і ганьбы. Жыве Беларусь!».
Пасьля выступаў дэпутаты ўсе разам пачалі выгукаць «Жыве Беларусь!», але старшыня Вярхоўнай Рады Ўкраіны Дзьмітро Разумкоў загадаў дэпутатам тэрмінова прыбраць бел-чырвона-белыя сьцягі з парлямэнцкай трыбуны і сэсійнай залі:
«Давайце, каб у Вярхоўнай Радзе Ўкраіны ў першую чаргу быў украінскі сьцяг! Ёсьць жаданьне — павесьце менавіта яго!».
