Сьледчы камітэт Беларусі распачаў крымінальныя справы па фактах ціску на дэпутацкі корпус, інфармуе Інтэрфакс са спасылкай на суботняе паведамленьне тэлеканалу «Беларусь-1».
21-ы дзень пратэстаў. Жаночы марш у Менску. У журналістаў забралі акрэдытацыі
«Устаноўлена, што ўказаньні на ажыцьцяўленьне супрацьпраўнай дзейнасьці ў дачыненьні да дэпутатаў паступілі ў Каардынацыйную раду з-за мяжы. Як мінімум два паведамленьні з пагрозамі накіраваныя зь Вялікай Брытаніі. Вінаватыя будуць прыцягнутыя да ўстаноўленай заканадаўствам адказнасьці, дзе б яны ні знаходзіліся», — заявіў у эфіры тэлеканалу «апэратыўны супрацоўнік», які застаўся неназваным.
Ціск ажыцьцяўляецца «замежнымі цэнтрамі з Польшчы і Чэхіі праз асобных членаў Каардынацыйнай рады, а таксама праз шэраг тэлеграм-каналаў», сьцьвярджае тэлеканал «Беларусь-1».
Паводле тэлеканалу, дэпутатаў заклікаюць адмовіцца ад сваіх паўнамоцтваў «пад пагрозай расправы над імі, іх дзецьмі, роднымі і блізкімі».
Раней член прэзыдыюму Каардынацыйнай рады, экс-міністар культуры і былы дырэктар Купалаўскага тэатру Павал Латушка падтрымаў грамадзкую ініцыятыву аб адклiканьнi дэпутатаў. «У грамадзян ёсьць права адклікаць мандаты ў дэпутатаў Палаты прадстаўнікоў або мясцовых саветаў, якія не выконваюць свае абавязаньні і страцілі давер выбарцаў», — сказаў Латушка. Ён падкрэсьліў, што дэпутаты ня маюць права бязьдзейнічаць, калі ў краіне парушаюцца законы.
