Пра выміраньне беларусаў
Лукашэнка раскрытыкаваў апанэнтаў, якія апэлююць да «выміраньня беларусаў» пры Лукашэнку. Спаслаўся на Ўкраіну: мінус 10 мільёнаў за 30 гадоў. Літва — мінус 1 мільён, Латвія — мінус 800 тысяч. У Беларусі, падлічыў ён, скарачэньне ўсяго 8%.
Сказаў, што ганарыцца новым пакаленьнем, хоць менавіта ў гэтым асяродку шмат іншадумства — «за што і атрымалі», удакладніў ён. Лічыць, што маладых бессаромна «выкарыстоўваюць» у палітычных мэтах, і прывёў некалькі лёзунгаў з тэлеграм-каналаў. «Ніхто не зьбіраецца красьці вашы галасы», — супакоіў Лукашэнка.
«Хто стаіць у „ланцугах салідарнасьці“ і „брыдкія нягоднікі-амапаўцы“ — гэта наша моладзь», — сказаў Лукашэнка.
Лукашэнка і моладзь
Лукашэнка ўскосна прызнаў, што моладзь супраць яго. Але, здаецца, не разумее, чаму.
Лукашэнка ў пасланьні называе сваіх апанэнтаў альтэрнатыўшчыкамі. За што ён іх крытыкуе
Падчас пасланьня Аляксандар Лукашэнка час ад часу згадвае сваіх апанэнтаў. Часьцей за ўсё ён іх называе «альтэрнатыўшчыкамі». Што ён пра іх кажа.
Аляксандар Лукашэнка кажа, што асноўная падтрымка «альтэрнатыўшчыкаў» — моладзь. Кажа, што за 26 гадоў «удалося выгадаваць свабодалюбівае пакаленьне, за што і атрымліваем».
Ён прыгадвае такія ініцыятывы апанэнтаў, як «Голас» і ініцыятывы за справядлівыя выбары.
«Калі нашыя кандыдаты або вечныя экспэрты-эканамісты, якія нідзе не працавалі, акрамя інтэрнэт-форумаў і Telegram-каналаў, ведаюць рэцэпт, як без сацыяльных выбухаў па-асабліваму рэфармаваць асобныя дзяржпрадпрыемствы, я гатовы іх ня толькі выслухаць. Абяцаю любому даць магчымасьць паказаць сябе на практыцы», — сказаў Лукашэнка.
Ён прыгадаў і выказваньні кандыдатаў пра неабходныя рэформы, маўляў, «прыватызацыя зьнішчыць сельскую гаспадарку». А «без працы нічога ня будзе».
Пры гэтым Аляксандар Лукашэнка прызнаў «крызіс у эканоміцы». Ён абяцае рост заробкаў за 5 гадоў удвая. Але ня згадвае, колькі за гэты час зьнішчыць інфляцыя.
«Нічога ў гэтых лялькаводаў не атрымаецца, толькі пацярпяць людзі», — кажа Лукашэнка.
Пра мову і культуру
«Нічога ў лялькаводаў не атрымаецца, проста пацярпяць нашы людзі, — папярэдзіў Аляксандар Лукашэнка. — Артысты будуць пісаць песьні, мастакі маляваць карціны, а мова назаўжды будзе ў нашым сэрцы і застанецца падмуркам незалежнасьці».
Лукашэнка і эміграцыя
Ня можа схаваць нэгатыўнае стаўленьне да той моладзі, якая з-за межаў пратэстуе супраць беларускай дыктатуры.
Усе, хто супраць Лукашэнкі — гэта людзі, якія страцілі сумленьне. То бок, нармальныя людзі проста ня могуць не падтрымліваць Лукашэнку. Відаць, ён сапраўды так думае.
У цэнтры Менску рыхтуецца бойня
«Неадукаваны чалавек — страшны чалавек у будучыні, — заявіў Лукашэнка. — Толькі той, хто сябруе з мазгамі, раскінуўшы імі, можа зразумець, што адбываецца ў сьвеце. А хто думае айфонам, таго будуць пастаянна замбаваць. Калі ня спынімся, будзем мець плянэту хаосу».
Усе вырашальныя бітвы адбываюцца ў інтэрнэце. «Каляровыя рэвалюцыі» нараджаюцца там, працягнуў ён. Людзі страцілі ўсялякае сумленьне, асабліва творцы: «Учора кланяліся, а што зь імі здарылася літаральна за суткі?»
Згадаў, што ў яго стралялі, білі, прыніжалі, але ён ня плакаў і не здаваўся. Здрада не даруецца нават на нябёсах. «Дайце выратаваць краіну. На эмоцыях нельга вырашаць ніводнае пытаньне». Папярэдзіў, што ў цэнтры Менску рыхтуецца «бойня».
Усе, хто супраць Лукашэнкі, — замежныя агенты
Мільярды кінутыя на дэстабілізацыю Беларусі. Значыць, ня можа быць, каб самі беларусы былі супраць Лукашэнкі. Усе, хто супраць Лукашэнкі, — замежныя агенты.
Пра новы атрад баевікоў
Лукашэнка расказаў пра 33 расейскіх наймітаў, якіх «рыхтавалі для беспарадкаў у Беларусі».
«Хлусьня пра Стамбул, Афрыку і Лацінскую Амэрыку. Каманда была чакаць сыгналу. Чаму празь Беларусь? А не з Крыму ці Наварасійску? Расказалі ўсё! Перастаньце хлусіць! Мы ўсё ведаем. Не напаляйце, бо палыхне так, што да Ўладзівастоку дабярэцца».
Сказаў, што паступіла інфармацыя пра яшчэ адзін атрад на поўдні — і гэта падчас уборачнай кампаніі.
За гэтымі жанчынамі нехта стаіць
То бок, ня могуць самі беларусы выступаць супраць такога добрага Лукашэнкі. Гэта ўсё замежныя лялькаводы.
Пра каманду Ціханоўскай: «Няшчасныя дзяўчаты»
Каманду Сьвятланы Ціханоўскай назваў «няшчаснымі дзяўчатамі», якія паняцьця ня маюць, што ім пішуць паліттэхнолягі.
«Выпусьцім зэкаў-наркаманаў, прызначым новыя выбары, — вось і ўся рыторыка. — Нават ня ведаюць, што не прэзыдэнт прызначае выбары».
З улікам новых тэхналёгій вырашылі зрабіць у Беларусі «каляровую рэвалюцыю», выказаў абазнанасьць ён. «Ня будзе такога! — папярэдзіў Лукашэнка. — Пакуль вэртыкаль улады моцная і карыстаецца даверам народу, разгойдаць дзяржаву не атрымаецца».
Паразы ў інтэрнэце
Лукашэнка прызнаў, што ў інтэрнэце ўлада выйграць ня можа ў прынцыпе, бо там «жаўцізна». Насамрэч, праблема паразы ўлады ў сацыяльных сетках палягае ў тым, што там трэба пераконваць, даваць аргумэнты, спрачацца. Што ўлада рабіць абсалютна ня ўмее. Яна можа толькі дубінкай па галаве.
Пра паразу ў інтэрнэце
Лукашэнка прызнаў, што ў інтэрнэце ўлада выйграць ня можа ў прынцыпе, бо там «жаўцізна». Насамрэч, праблема паразы ўлады ў сацыяльных сетках палягае ў тым, што там трэба пераконваць, даваць аргумэнты, спрачацца. Што ўлада рабіць абсалютна ня ўмее. Яна можа толькі дубінкай па галаве, прызнаў Лукашэнка.