Падзеі 2 жніўня ў беларускай і сусьветнай гісторыі.
Дата дня
2 жніўня 1937 году ў БССР пачаліся масавыя арышты і вынішчэньне так званых «польскіх шпіёнаў» — грамадзянаў польскай нацыянальнасьці. За год было арыштавана каля 16 тысяч такіх «шпіёнаў». Зь іх 14 тысяч расстралялі.
Таксама ў гэты дзень
1914 — расейскі імпэратар Мікалай ІІ сваім маніфэстам абвясьціў аб вайне зь Нямеччынай. У Баранавічах разьмешчана Стаўка Вярхоўнага галоўнакамандуючага ўзброеных сілаў Расейскай імпэрыі.
105 гадоў пачалася Першая сусьветная вайна. Што вы ведаеце пра яе?
1990 — войскі Іраку ўварваліся ў Кувэйт.
У гэты дзень нарадзіліся
1549 — нарадзіўся Мікалай Радзівіл Сіротка, вялікалітоўскі дзяржаўны дзяяч, падарожнік, мэмуарыст. У 1582-1584 зьдзейсьніў падарожжа ў Ерусалім. Убачанае і перажытае ён запісаў у эпічнай «Пэрэгрынацыі, або Паломніцтве ў Сьвятую зямлю», якая ўпершыню выйшла ў сьвет на лаціне ў 1601 годзе.
У памяці
1833 — у Горадні пакаралі сьмерцю на шыбеніцы Міхала Валовіча, удзельнік паўстаньня 1830-1831 гг., кіраўнік сялянскага паўстаньня на Слонімшчыне (1833). Валовіч быў заўзяты прыхільнік утапічнага сацыялізму і ў сваіх марах бачыў Беларусь рэспублікай.
1976 — памёр Фрыц Лянг, нямецкі сцэнарыст, кінарэжысэр, актор і прадусар аўстрыйскага паходжаньня, заснавальнік нямецкага экспрэсіянізму ў кіно ў міжваенны пэрыяд.
