Дзяржаўныя прадпрыемствы і прыватныя кампаніі, якія займаюцца разьмяшчэньнем вонкавай рэклямы, адмовілі кандыдатцы ў прэзыдэнты Беларусі Сьвятлане Ціханоўскай у разьмяшчэньні агітацыйных білбордаў.
30 ліпеня Ціханоўская падпісала дамову зь дзяржаўнай арганізацыяй «Гомельаблрэкляма» на разьмяшчэньне рэклямных плякатаў на 7 білбордах у Гомельскай вобласьці. Гэта была адзіная кампанія, якая «ў прынцыпе пагадзілася зрабіць нам такую паслугу», адзначаюць у прэс-службе кандыдаткі.
Аднак ужо на наступны дзень дырэктар кампаніі патэлефанаваў і папрасіў прабачэньня, што ня можа выканаць дамову, бо Гомельскі аблвыканкам забараніў гэта рабіць, матывуючы тым, што яму тэрмінова спатрэбілася разьмясьціць 7 плякатаў сацыяльнай рэклямы.
Прэсавая сакратарка Гомельскага аблвыканкаму Вольга Рабікава паабяцала Свабодзе разабрацца ў гэтым пытаньні і даць камэнтар па абедзе 31 ліпеня.
Прадстаўнік Гомельскага гарвыканкаму, адказны за ідэалёгію, Мікалай Сьвятагор таксама адмовіўся пракамэтаваць выпадак, спаслаўшыся на няведаньне дэталяў.
Як паведамляе прэс-служба Ціханоўскай, дзяржаўнае прадпрыемства «Менскрэкляма» адмовілася разглядаць магчымасьць разьмяшчэньня плякатаў, спасылаючыся на тое, што сацыяльная рэкляма важнейшая за выбары.
У штабе Ціханоўскай зьвярталіся таксама ў прыватныя кампаніі ў Берасьці, Горадні, Менску і Гомлі. Паўсюль ім адмаўляюць, паведамляе прэс-служба кандыдаткі.
Згодна зь дзейным заканадаўствам кандыдат не абавязаны ўзгадняць агітацыйныя матэрыялы. Перашкоды з боку органаў выканаўчай улады — гэта найгрубейшае парушэньне выбарчага заканадаўства і правоў грамадзян на атрыманьне інфармацыі пра кандыдата, адзначаюць у штабе кандыдаткі.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
